Re gjigande të tymit nga zjarret e vazhdueshme që vijnë nga Kanadaja kanë përfshirë qiejt mbi pjesën më të madhe të bregdetit verilindor, duke nxitur alarme serioze për cilësinë e ajrit për miliona amerikanë.
Që nga mëngjesi i së mërkurës, 13 shtete kanë lëshuar këto alarme, pasi tymi i dendur ka bllokuar qiellin. Banorët janë izoluar në ambiente të mbyllura, për të shmangur frymëmarrjen në ajrin e ndotur.
Zyrtarët kanadezë thanë se zjarrfikësit po përpiqen të shuajnë flakët në Quebec, ku aktualisht janë aktive më shumë se 160 zjarre pyjore.
Qindra shkolla në 13 shtete janë urdhëruar të mbyllen menjëherë, kurse qytetarët janë këshilluar të limitojnë lëvizjet dhe të mbyllen në banesa.
Siguria e jetës sipas autoriteteve prevalon e para, deri në normalizimin e situatës, që duket se do të zgjasë, duke parë intensitetin e gazrave në atmosferë, aq sa edhe dielli është shndërruar në ‘ngjyrën e gjakut.
Në Toronto, cilësia e dobët e ajrit do të zgjasë deri në fundjavë, paralajmëruan zyrtarët të mërkurën.
“Cilësia e ajrit dhe dukshmëria e ulët për shkak të tymit të zjarreve mund të luhatet në distanca të shkurtra dhe mund të ndryshojë në mënyrë të konsiderueshme nga ora në orë,” thanë zyrtarët në një “Deklaratë Speciale për Cilësinë e Ajrit”.
“Tymi me intensitet kaq të lartë mund të jetë i dëmshëm për shëndetin e të gjithëve. Vazhdoni të merrni masa për të mbrojtur shëndetin tuaj dhe për të zvogëluar ekspozimin” – thuhet nê deklaratën zyrtare.
