Shtetasi italian Gabriele Tarroni Longhinotti është arrestuar në vitin 2021 dhe u dënua nga Gjykata me 6 vite burgim për mashtrim.
Ky person u shfaq në një emision të transmetuar nga Syri TV, ku sulmoi ish-ortakun e tij në biznes, Alberto Presezzi, por në deklarime përmendi edhe emrin e kryebashkiakut Veliaj.
Pas transmetimit të emisionit, kryebashkiaku njoftoi se ka paditur penalisht për shpifje televizionin Syri, emisionin “Piranjat”, një gazetar me emrin Bledian Koka dhe producentin e emisionit, të quajtur Vojo Bregu.
Në një dalje për mediat, avokati Plarent Ndreca bëri me dije se ditën e sotme, në Gjykatën e Rrethit Gjyqësor Tiranë, është depozituar padia, ku deklarimet janë cilësuar si shpifje ordinere dhe falsifikim faktesh.
“Përveçse një shpifje ordinere alla ‘babale’, duket qartë se kjo është një skemë mashtrimi, e cila ka si qëllim vetëm garën elektorale dhe denigrimin e kandidatit të PS. Skema provohet nga fakti se, menjëherë pas publikimit të këtyre fakteve të rreme, u përqafua nga kandidati i Partisë së Lirisë dhe eksponentët e Partisë së Lirisë. Kjo përbën një shkelje të rëndë të ligjit.
Përmes kësaj padie, ftojmë të gjithë ata që janë marrë me këtë skemë mashtrimi, të vijnë në gjykatë dhe të parashtrojnë faktet, ose ndryshe të mbajnë përgjegjësi ligjore për shpifjet e bëra dhe të përgënjeshtrojnë me të njëjtën mënyrë gënjeshtrën që kanë publikuar”, deklaroi avokati Ndreca.
I pyetur për këtë çështje, kryebashkiaku Veliaj tha se: “Dëshpërimi i Foltores dhe gjendja e rëndë në të cilën ndodhet dyshja Berisha-Meta, shkojnë deri atje sa përdorin televizionin e Zenit, paratë e Vojos dhe sajesat e një shtetasi italian, të certifikuar me vendim gjykate si mashtrues ordiner, për të kapur ndonjë votë aty-këtu.
Por, përveç përgjigjes së merituar që do të marrin nga qytetarët e Tiranës në 14 maj, non-gratat dhe delfinët e tyre do të detyrohen ligjërisht të përgënjeshtrojnë shkronjë për shkronjë e fjalë për fjalë të gjitha shpifjet e sajuara”.
Historia e mashtrimit
Duket se gjithçka është një përpjekje për hakmarrje personale, ndaj ish-ortakut të tij, Alberto Presezzi, i cili e kishte denoncuar më herët Longinotti-n për mashtrim. Pas këtij denoncimi Longinotti u arrestua në muajin prill të vitit 2021, pasi Gjykata kishte caktuar ndaj tij masën e sigurisë “Arrest me burg” për akuzën e mashtrimit.
Longinotti u akuzua për mashtrim ndërkombëtar ndaj kompanisë “BP”, së cilës i ka vjedhur shumën prej rreth 1 milion eurosh, si dhe akuzohej për falsifikim dokumentesh bankare.
Mësohet se i njëjti person është vetëofruar në disa televizione si dëshmitar, duke pretenduar se “di skandale të mëdha”, edhe pse nuk ka paraqitur deri tani dokumenta apo prova që të mbështesë deklarimet e tij. Synimi i tij mbetet sulmi ndaj ish-ortakut.
o.j/dita
