Drejtësia ‘lëngon’ nga stoku i dosjeve, 42 gjyqtarë i shtohen sistemit! Kreu i KLGJ: Çekiçi i fundit është i Zotit

42 magjistratë të rinj i janë bashkuar sot sistemit të drejtësisë. Pas viteve të studimit dhe trajnimit në Shkollën e Magjistraturës, ata bënë betimin përpara Këshillit të Lartë Gjyqësor, duke nisur kështu zyrtarisht rrugëtimin si gjyqtarë.

Nga kjo e enjte 42 gjyqtarë të rinj i shtohen sistemit të drejtësisë në vend, në një moment kur ka nevojë më shumë se kurrë. Të diplomuarit e këtij viti u betuan në një ceremoni të veçantë në ambientet e KLGJ, e cila vetëm një ditë më parë i shpërndau në 11 gjykata të vendit.

Kreu i KLGJ-së, Ilir Rusi, u bëri thirrje gjyqtarëve të rinj që të jenë të ndershëm dhe të mbajnë lart integritetin e profesionit. Rusi u tha gjyqtarëve të rinj se vendimet e tyre do të kenë peshë për shoqërinë dhe drejtësinë në vend. “Çekiçi i fundit është i Zotit”, theksoi ai.

“Tani filloni një rrugëtim të ri, të jesh magjistrat do të thotë të kesh një përgjegjësi të madhe. Është momenti që ju keni një mision. Ju dhe ne në radhë të parë duhet të jemi njerëz. Duhet të keni një barazi të drejtësisë së ligjit dhe drejtësisë hyjnore. Do të jeni vëmendja e të gjithëve, jo ju personalisht, por profesioni juaj. Vendimi që do të merrni ka shumë rëndësi. Krijoni personalitetin tuaj në raport me integritetin. Nëse keni integritet misoni është përmbushur. Mos jini krenar ende për veten tuaj, koha do të tregojë sa krenarë do të jeni. ”, tha Ilir Rusi.

Edhe drejtori i Shkollës së Magjistraturës, Arben Rakipi, u shpreh se betimi nuk duhet të jetë vetëm një ceremoni formale, por një zotim që do t’i shoqërojë gjatë gjithë karrierës.

“Besoj se duke njohur kandidatët për të gjitha sakrificat që kanë bërë jam i bindur se betimin nuk do ta konsideroni vetëm si një fjalë, por si një premtim që do t’ju shoqërojë gjatë gjithë jetës. Kur të mblidhemi në të ardhmen do të rikujtoijmë se çfarë kemi besuar te njëri-tjetri. Pres suksese për të gjithë ju”, tha Arben Rakipi.

Me emërimin e magjistratëve të rinj, numri i gjyqtarëve aktivë në sistemin gjyqësor shqiptar shkon në 307, ndërsa në total janë 350 të emëruar. Megjithatë, në shkallë kombëtare vijojnë të mbeten 67 vende vakante në gjykata.

Situata më e rënduar paraqitet në Gjykatën e Apelit të Juridiksionit të Përgjithshëm, ku nga 78 vende të parashikuara, janë të mbuluara vetëm gjysma , duke ndikuar ndjeshëm në ecurinë e çështjeve.

Shpërndarja e magjistratëve në 11 gjykata

-3 në Berat
-7 në Elbasan
-7 në Fier
-2 në Gjirokastër
-2 në Korçë
·2 në Kukës
-4 në Lezhë
-1 në Sarandë
-5 në Shkodër
2 në Vlorë
-7 në Lushnjë