Kreu i SPAK Altin Dumani, gjatë një komunikimi pa kamera me gazetarët ka thënë se Prokuroria e Posaçme është në pritje të përgjigjes për kërkesën për ekstradim të ish-zv. kryeministrit Arben Ahmetaj. Dumani ka thënë ndër të tjera se procedura zgjat. Ai nuk ka pranuar të komentojë nëse Ahmetaj ka bërë kërkesë për azil ose jo.
“Që ditën që kemi bërë kërkesën për ekstradim jemi në pritje”, mësohet të ketë thënë Dumani.
Ndërsa në lidhje me akuzat e Ahmetajt në emisionin investigativ “Reporter” të “Rai3”, Dumani ka thënë se deklaratat e dhëna po vlerësohen.
“Lidhur me inceneratorët, çështja është nën hetim. Edhe deklaratat e dhëna nga personi në fjalë po vlerësohen. Ka persona të hetuar, të arrestuar, një ndër ta është zoti Ahmetaj”, ka thënë ai.
Dumani ka deklaruar se dosja ‘Xibraka’ është rihapur dhe po hetohet roli i të gjithë personave, përfshirë edhe vëllanë e kryeministrit Edi Rama, Olsi Rama. Gjatë një bashkëbisedimi me gazetarët, Dumani ka konfirmuar se është duke u hetuar edhe skandali McGonigal.
“Po SPAK ka rifilluar hetimet dhe ka të regjistruar procedim penal për dosjen “Xibraka”, po hetohet. Ne kemi disponuar mosfillimin dhe thuhet qartësisht që nuk ka bërë kallëzim Bardhi”, tha Altin Dumani
Ndërsa për çështjen e skandalit McGonigal ku është i përfshirë Edi Rama, Dumani tha se janë në fazë hetimi.
“Jemi në fazën e hetimit paraprak”, tha kreu i SPAK.
Dumani ka folur dhe për persona të hetuar nga Prokuroria e Posaçme që dyshohet se ndodhen në Dubai. Dumani ka treguar se SPAK ka nën hetim 7 persona që dyshohet se ndodhen në atë vend. Sigurisht, kreu i SPAK nuk zbuloi emra konkretë, duke mos penguar kështu hetimin.
PYETJE: A ka bërë SPAK një skanim sa persona janë në kërkim dhe strehohen në Dubai?
DUMANI: Po për llogarinë e SPAK janë shtatë persona që dyshohen se gjenden në Dubai.
j.l./ dita
