Palombarët e Renea-s kanë nxjerrë nga uji edhe trupat e 3 viktimave të tjera që mbetën të mbytur në Liqenin e Banjës.
Në liqenin e Banjës u mbytën babai 46 vjeç, dy fëmijët 19 dhe 14 vjeç dhe kushëriri i tyre Melis Zogu, 20 vjeç.
Trupi i parë që u nxor nga uji ishte ai i 46-vjeçarit. Forcat RENEA punuan për gati dy orë me zhytje intensive.
“Angazhimi maksimal e profesional i Polumbarëve të Reneas bëri të mundur gjetjen dhe nxjerrjen e trupave të pajetë të katër shtetasve të mbytur në liqen, mbasditen e sotme.
Polumbarët e Reneas pas rreth 90 minuta kërkimesh, në kushte të pafavorshme për shkak të errësirës kanë bërë të mundur gjetjen dhe nxjerrjen e trupave të pajetë të 4 shtetasve, që u mbytën pasditen e sotme në liqenin e hidrocentralit të Banjës, ( 46-vjeçarit Arbe Zogu, të dy djemve të tij, Rubens Zogu, 19 vjeç dhe Esti Zogu, 14 vjeç si dhe të 20-vjeçarit Melis Zogi)”, njoftoi Policia.
Një nga të afërmit e 4 viktimave që mbetën të mbytur në liqenin e Banjës në Gramsh, u shpreh se ata kishin shkuar për t’u larë rreth orës 15.
Sipas tij ata i morën rreth orës 17 në telefon, por nuk po u përgjigjeshin.
‘Shkuan për tu larë. Vapë e madhe, thanë do ikim të lahemi. U nisën nga shtëpia. U nisën në orën 3 dhe në orën 5 i morëm në telefon por nuk po na përgjigjeshin,’ tha për Report TV, i afërmi me lot në sy.
