Një ngjarje e rëndë ka tronditur Shkodrën në orët e para të mëngjesit, ku si pasojë e një konflikti për motive të dobëta, 25-vjeçari Andri Vulaj ka plagosur me armë zjarri Qamil Lulin 63 vjeç dhe Ylber Lulin 24 vjeç, babë e bir.
Si pasojë e plagëve të marra, 24-vjeçari ka ndërruar jetë në spital.
Ndërkohë, i plagosur me thikë ka mbetur edhe vetë autori, Andri Vulaj, ndërsa është vënë në pranga nga policia. Sakaq, grupi hetimor vijon veprimet për sqarimin e plotë të rrethanave të ngjarjes, përcaktimin e përgjegjësive dhe dokumentimin e plotë ligjor të saj.
Njoftimi i Policisë:
Rreth orës 05:30, në lagjen “Kongresi i Përmetit”, Shkodër, dyshohet se, si pasojë e një konflikti për motive të dobëta, shtetasi A. V. ka plagosur me armë zjarri shtetasit Q. L., 63 vjeç, dhe Y. L., 24 vjeç (babë e bir), ndërsa këta të fundit dyshohet se kanë plagosur me mjet prerës (thikë) shtetasin A. V., 25 vjeç.
Si pasojë e plagëve të marra, shtetasi Y. L., 24 vjeç, ka ndërruar jetë në spital.
Shërbimet e Policisë kanë shkuar në vendngjarje, ku kanë bërë të mundur kapjen dhe shoqërimin e shtetasit A. V., si dhe gjetjen dhe sekuestrimin e armës së zjarrit, pistoletë, që dyshohet se është përdorur në ngjarje.
Grupi hetimor vijon veprimet për sqarimin e plotë të rrethanave të ngjarjes, përcaktimin e përgjegjësive dhe dokumentimin e plotë ligjor të saj.
j.l./ dita
