Një tjetër i huaj kundërshton ekstradimin drejt vendit të tij, pas vendimit që ka marrë drejtësia shqiptare. Bëhet fjalë për kreun e grupit kriminal kinez, Liangbin Chen, i cili gjithashtu ka bërë rekurs të vendimit të Gjykatës së Apelit në Tiranë, që la në fuqi vendimin për ekstradimin e tij në Kinë. Depozitimi në Gjykatën e Lartë është bërë nga avokati i tij dhe pritet caktimi i datës së procesit për shqyrtim, ku i kërkuari kinez pretendon se në vendin e tij i rrezikohet jeta.
Liangbin Chen u arrestua në Tiranë rreth një vit më parë, ndërsa ishte në kërkim ndërkombëtar, pasi ka realizuar grabitjen me mashtrim kompjuterik me vlerë rreth 145 milionë euro.
Gjykata e Apelit la në fuqi vendimin e Shkallës së parë për ekstradimin e tij, ndonëse kinezi Liangbin Chen kishte kërkuar që përveç lirimit nga qelia, të përfitojë edhe azil politik në Shqipëri, me argumentin se i rrezikohet jeta nëse kthehet në Kinë.
Kapja e tij u bë më 21 korrik në aeroportin e Rinasit. Ai kishte ardhur nga Dubai për t’u strehuar në arrati në vendin tonë. Kinezi akuzohet si kreu i bandës, e cila ka pasur selinë në qytetin Huzhou në Kinë dhe që ka kryer mashtrime në platformat online; për ambiente me qira, shitje kompjuterash dhe telefonash në Dubai, Kinë dhe Emiratet e Bashkuara Arabe. Chen rezultonte në kërkim ndërkombëtar dhe akuzohej për “mashtrim me pasoja të rënda”.
Pjesa më e madhe e mashtrimeve bëhej nëpërmjet platformave sociale apo edhe adresave e-mail, ku kryheshin pagesa nga abonentët e shumtë, por që në fakt mashtroheshin, sepse këto para kaloheshin nëpërmjet një sistemi paralel me servera, të krijuar nga të dyshuarit dhe depozitoheshin më tej në llogari off-shore. Ka dyshime se Chen i përket një grupi të organizuar dhe të rrezikshëm, degëzim i “Triadës” kineze, mafia tradicionale shekullore e këtij vendi. Gjatë procesit i dyshuari e ka mohuar akuzën, duke thënë se po përndiqej dhe i duhej të shpëtonte jetën.
