Një tjetër plantacion me kanabis sativa u zbulua gjatë operacioneve që po zhvillohen në zonën e thellë të vendit, Malësi të Madhe, Shkodër dhe Velipojë. Pas aksionit të koduar “Krateri”, sot u finalizua edhe një tjetër goditje e quajtur “Njësia”. Të paktën 2150 fidanë kanabis në kubikë, gati për kultivim në tokë, janë asgjesuar nga policia e Shkodrës. Në pranga ka rënë Fatmir Bajrami, 55 vjeç dhe u shpall ne kërkim vëllai i tij, Xhevahir Bajrami, 37 vjeç. Të dy familjarët akuzohen si autorë të dyshuar të kultivimit të fidanëve narkotikë.
Gjatë kontrollit në territorin e fshatit Luarzë, shërbimet e Policisë gjetën 1900 fidanë të dyshuar narkotikë kanabis sativa, në kubikë, pjesa më e madhe e tyre e mbuluar me plastmas. Gjatë kontrollit në anë të lumit Buna, në territorin e fshatit Reç i Vjetër, Policia gjeti edhe 250 fidanë të dyshuar narkotikë të kultivuar në kubikë. Një pjesë e fidanëve u sekuestrua në cilësinë e provës materiale, ndërsa pjesa tjetër u asgjësua me anë të djegies. Operacioni antikanabis u zhvillua nga Komisariati i Policisë Shkodër, në bashkëpunim me Stacionin e Policisë Velipojë dhe falë përdorimit të dronëve, u evidentuan dhe u goditën rastet e tentativës për të kultivuar bimë narkotike.
Operacioni vijon për kapjen e Xhevahir Bajramit, identifikimin dhe kapjen e të tjerëve të implikuar në këtë veprimtari kriminale. Materialet i kaluan Prokurorisë pranë Gjykatës së Rrethit Gjyqësor Shkodër, për veprime të mëtejshme, për veprën penale “kultivimi i bimëve narkotike”, kryer në bashkëpunim, më shumë se një herë.
