Elon Musk ka hequr dorë nga planet për të krijuar një parti të tretë politike në SHBA dhe tani po fokuson pasurinë e tij për të mbështetur JD Vance si presidentin e ardhshëm.
Themeluesi i Tesla dhe ish-drejtues i DOGE, kishte kaluar muaj të tensionuar duke punuar me presidentin Donald Trump dhe tani preferon të shmangë përplasjet me republikanët. Ai ka vendosur të bashkohet me figura të tjera të teknologjisë që mbështesin Vance, i cili pritet të kandidojë në 2028 si pasardhës i mundshëm i Trump, sipas asaj që raporton The Wall Street Journal.
Përveç Musk, mbështetje financiare ndaj Vance kanë dhënë edhe Peter Thiel, David Sacks, Anthony Wood dhe Palmer Luckey. Sondazhet e fundit tregojnë Vance si favorit për nominimin republikan.
Musk ka shprehur shqetësim se lansimi i “America Party” për zgjedhjet e mesit të mandatit në 2026 mund të dëmtojë marrëdhënien me Vance. Gjithashtu, përgatitjet për partinë e re duket se nuk kanë filluar ende seriozisht, as për regjistrimin në fletët e votimit dhe as për organizimin e mbështetësve.
Marrëdhënia e Musk me Trump ka njohur tensione, sidomos pas ndihmës prej 300 milionë dollarësh për fitoren e Trump në 2024 dhe përplasjes së mëvonshme ku Musk e kritikoi Trump publikisht. Megjithatë, Trump ka thënë në korrik se dëshiron që Musk dhe kompanitë e tij të “lulëzojnë” dhe ka hequr kërcënimet për të ndërprerë kontratat qeveritare ndaj SpaceX, Neuralink dhe të tjera.
“The America Party” ishte shpallur pas një votimi online nga ndjekësit e Musk në 4 korrik, ku 65.4% e tyre u shprehën për krijimin e partisë. Musk e quajti atë një mundësi për “t’ju rikthyer lirinë” qytetarëve, por duket se projekti përfundoi para se të fillonte seriozisht.
Tani, Musk duket se po shikon drejt politikës tradicionale republikanë, duke përdorur ndikimin e tij financiar për të mbështetur kandidatët që mund të realizojnë vizionin e tij politik për SHBA-në.
j.l./ dita
