Vendet e Bashkimit Evropian kanë rënë dakord që të kufizojnë vizat për vendet që nuk bashkëpunojnë për të rikthyer emigrantët që shkojnë në Evropë nga vendet e tyre.
Gjatë takimit në Stokholm të ministrave të Emigracionit në BE, u diskutuan kufizimet e vizave dhe një koordinim më i mirë brenda bllokut për kthimin në vendet e origjinës të emigrantëve pa të drejtë azili në Evropë.
Komisioni Evropian propozoi hapa të ngjashëm për Irakun, Senegalin dhe Bangladeshin, ndërsa dy zyrtarë të bllokut thanë se është përmirësuar bashkëpunimi me Bangladeshin për kthimin e emigrantëve. Sipas të dhënave të fundit nga Eurostat, shkalla e përgjithshme e kthimeve të bllokut gjatë vitit 2021 ishte 21% .
Ministrja suedeze emigracionit, Maria Malmer Stenergard foli për median para fillimit të takimit. Aktualisht Suedia mban presidencën e radhës të BE-së.
“Kemi një situatë serioze për sa i përket emigrimit në Evropë. Po vërejmë shtimin e prurjeve të parregullta. Gjatë diskutimeve për çështjet e brendshme do të përqendrohemi tek kthimi i atyre që u është mohuar azili në Evropë. Kjo është e rëndësishme dhe Evropa mund të veprojë më mirë”.
“I jam shumë mirënjohës presidencës suedeze që azili dhe emigrimi i paligjshëm janë sot në qendër të diskutimeve, sepse është e nevojshme, kur shikohen shifrat e viteve të fundit dhe ato aktuale, që vazhdojnë të rriten në Evropë dhe Austri në veçanti. Është e rëndësishme që të shtohet lufta kundër keqpërdorimit të azilit”, tha Gerhard Karner, Ministër i Brendshëm i Austrisë.
Rreth 160,000 emigrantë kaluan Mesdheun gjatë vitit 2022, sipas të dhënave të OKB-së, rruga kryesore për në Evropë për ata që largohen nga luftërat dhe varfëria në Lindjen e Mesme, Afrikë dhe Azinë Juglindore. Gjithashtu, rreth 8 milionë refugjatë ukrainas u vëndosen në Evropë.
