Policia e Korçës ka zbardhur dinamikën e konfliktit të ndodhur mbrëmjen e së dielës në lagjen nr. 1, në një lokal, ku mbetën të plagosur me thikë dy persona.
Në njoftimin e kësaj të hëne, policia njofton se janë vënë në pranga 10 persona që u përfshinë në konfliktin për motive të dobëta, ndërsa një tjetër është shpallur në kërkim.
Po ashtu, është proceduar penalisht pronari i lokalit për punësimin e punonjësve të paregjistruar në organet kompetente.
Më konkretisht në njoftim thuhet se u arrestua 54-vjeçari Dritan Pino, banues në Korçë, i cili akuzohet për vrasje me dashje në tentativë, plagosje të rëndë dhe të lehtë me dashje, shkatërrim prone, deklarim të rremë para policisë, prishje të qetësisë publike dhe mbajtje pa leje të armëve të ftohta.
Të arrestuarit e tjerë janë Petrika Ropi, 28 vjeç; Ilir Shukulli, 51 vjeç; Rafail Kocaqi, 21 vjeç; Salvi Asllan, 21 vjeç; Mihal Zhidro, 31 vjeç; Serxhio Mema, 25 vjeç; Gersi Dervishi, 37 vjeç; Sotiraq Shkurti, 31 vjeç; dhe M.L., 29 vjeç, të gjithë banues në Korçë, për veprat penale plagosje të rëndë dhe të lehtë me dashje, shkatërrim prone, deklarim të rremë para policisë dhe prishje të qetësisë publike.
Në kërkim është shpallur shtetasi E.K., 38 vjeç, banues në Korçë, i dyshuar për përfshirje në konflikt.
Gjatë konfliktit, personat janë përplasur fizikisht dhe me sende të forta, duke shkaktuar dëme në lokal dhe duke prishur qetësinë publike, ndërsa gjatë hetimeve disa prej tyre kanë dhënë deklarata të rreme.
Në vijim, është proceduar penalisht pronari i lokalit, shtetasi R.I., 45 vjeç, për punësim të paligjshëm, pasi kishte punonjës të paregjistruar. Materialet iu referuan Prokurorisë së Korçës për veprime të mëtejshme.
j.l./ dita
