“Është përdhunuar edhe në qershor”, dramë e shtuar me 11 vjeçaren në Prishtinë, gjashtë të arrestuar të tjerë

Gjashtë persona janë arrestuar nën dyshimin se në muajin qershor kishin kryer tri vepra, ndër to atë të trafikimit të 11-vjeçares në Prishtinë. Krimi dyshohet të ketë ndodhur në qershor.

Kjo është vepër e ndarë nga ngjarja që  ndodhi në fundin e këtij gushti, kur 11-vjeçarja dyshohet se është dhunuar nga pesë persona.

Në një komunikatë të përbashkët të Prokurorisë dhe Policisë, më 3 shtator, thuhet se një ditë më herët janë arrestuar gjashtë persona, të cilët dyshohen për tri vepra penale në qershor, në periudhën kur e mitura ishte raportuar si person i zhdukur.

“Trafikimi me njerëz”, “Shërbimet seksuale të viktimës së trafikimit” dhe “Dhunimi” janë veprat për të cilat ata dyshohen.

“Sigurojmë opinionin publik se për të dy çështjet penale ku e përfshirë është viktima e mitur, prokuroria në koordinim me institucionet e tjera relevante ka ndërmarrë të gjitha veprimet e nevojshme hetimore me profesionalizëm e përgjegjësi”, thuhet në njoftim.

Për rastin më 30 gusht ka dhënë dorëheqje drejtori i përgjithshëm Policisë së Kosovës, Samedin Mehmeti. Një ditë më pas, dha dorëheqjen edhe Ali Gashi, drejtor për trajtimin e të burgosurve dhe të miturve në Shërbimin Korrektues të Kosovës.

Më 2 shtator, kryeministri i Kosovës, Albin Kurti, ka njoftuar edhe për dy shkarkime të tjera në Polici. Shoqëria civile dhe shumë qytetarë, më 30 dhe 31 gusht kanë organizuar dy protesta në Prishtinë lidhur me rastin.

i.b. / dita