Evi Kokalari: Sot përfundimisht Berisha më ka kundër, po përdor Grenell për t’i dhënë një dorë Këlliçit dhe pazareve që do vet

E shfaqur për një kohë të gjatë në krah të Sali Berishës si një nga mbështetëset e tij më të forta në turin e kreut të PD-së nëpër Shqipëri pasi u shpall non grata nga Departamenti Amerikan i Shtetit, Evi Kokalari ka njoftuar se nga sot është kundër tij.

Në një shënim në Facebook, ajo thekson se Berisha jo vetëm që nuk bëri ndryshime në PD, por e ka marrë peng PD-në për interesat e tij dhe po bën pazare.

Ajo sqaron se Berisha po tenton për të përdorur Grenell pa dijeninë e tij, për ti dhënë një dorë Këlliçit dhe pazareve që do vet.

“Sot përfundimisht Berisha më ka kundër. Jo vetëm që s’bëri ndryshime në PD, por e ka marrë partine peng për interesat e veta dhe po ben pazare.
Tentativa për të përdorur Grenell pa dijeninë e tij, për ti dhënë një dorë Këlliçit dhe pazareve që do vet, kur Grenell është futur në skenë prej meje, fatkeqësisht sot më pozicionon kundër tij!
Kur them kundër- flas kundër Berishës vetë, aspak PD-se.
Madje mendoj ka ardhur koha që Berisha të dalë nga politika, se po na çon në humnerë”, shkruan Kokalari.

Por ish i Dërguari i Posaçëm i administratës Trump për dialogun mes Kosovës dhe Serbisë, Richard Grenell është akuzuar se “punon” si lobues i Serbisë. Media serbe “Nova.rs” ka bërë me dije se Serbia ka paguar për vetëm tre vite lobim në Shtetet e Bashkuara, 1.3 milion dollarë për kompaninë “Yorktoën Solutions LLC”. Sipas artikullit, deri në fund të vitit 2022 kjo kompani do të përfitojë edhe gjysmë milioni më shumë dollar për këto shërbime. Ajo që implikon Grenell në këtë histori është fakti që në listën e kontakteve, të cilat kompania lobuese raportoi për Serbinë, përfshihen edhe Richard Grenell.