Festa e madhe e “Ekipeve Sportive në Shkolla”, Rama nga ‘Air Albania’: Këtu janë kampionët e ardhshëm

Me miratimin e “Strategjisë Kombëtare të Rinisë”, në të gjitha shkollat e vendit janë ngritur 700 ekipe sportive. Falë këtij projekti që do të krijojë elitën e ardhshme të sportit elitar, fëmijëve do t’u mundësohen veshjet sportive falas.

Kryeministri Edi Rama, i cili ishte i pranishëm në ceremoninë e përurimit që u mbajt në ambientet e stadiumit ‘Air Albania’, tha se aty ndodhen kampionët e ardhshëm që do të ngrenë lart flamurin Shqiptar.

Ministrja Evis Kushi gjithashtu e pranishme tha se ky projekt synon që në shkollë të zhvillohet edhe mësim, por fëmijët nga ana tjetër të argëtohen. Kushi u bëri thirrje të rinjve që të merren me sport për një jetë më të shëndetshme.

“Projekti që konsolidon të gjitha reformat që kemi marrë në këto vite për sportin. Kam një thirrje, sporti është jetik për shëndetin fizik, mendor social, ju mëson leksionet më të mira për jetën, disiplinën, punën në skuadër. Ta kthejmë shkollën në një vend ku edhe mësohet por edhe luhet. Ta kthejmë shkollën në vendin ku ka gjallëri, por edhe jetë të shëndetshme”, tha Kushi.

Nga ana tjetër, ministrja e Rinisë dhe Fëmijëve, Bora Muzhaqi u tha të rinjve se pas krijimit të këtyre ekipeve sportive do të zhvillojnë edhe kampionate në rang qarku por edhe nivel kombëtar.

“Sot nuk kemi kohë për fjalë, jemi për vepra. Fakti që të gjithë jemi këtu. Këmbëngulje çdo ditë për t’ia arritur, për të bërë kampionate. Shumë suksese dhe fitoftë më i miri”, tha Muzhaqi.

a.m/dita