Nga Viktor Malaj
Botuar në DITA
Në shoqërinë shqiptare, si kudo në botë, ka individë të shquar e të pashquar, por të heshtur që, me sjelljet dhe punën e tyre meritojnë respektin dhe vlerësimet e shoqërisë, ashtu siç ka individë, me apo pa pozita shtetërore, sjelljet dhe veprat e të cilëve dëmtojnë shoqërinë dhe meritojnë përbuzjen e saj.
Në skenën publike dhe median shqiptare është bërë e modës që të promovohen dhe lavdërohen gjithfarë individësh të shpallur VIP-a dhe që, fatkeqësisht, në shumicë dërmuese përbëjnë antinjeriun dhe shembullin që nuk duhet ndjekur.
Media ndjek kryesisht qëllime komerciale, pra të fitimit material, dhe si e tillë nuk duhen marrë shumë parasysh zgjedhjet dhe paraqitjet e saj.
Njeriu i Vitit, dhe njeriu i viteve, është çdo qytetar shqiptar që, në heshtje dhe me sakrifica, jep maksimumin e vet në veprimtarinë e përditshme, ekonomike apo intelektuale, është fshatari që rropatet nëpër ara gjithë vitin për të siguruar mbijetesën apo për të rritur nivelin e mirëqenies, është punëtori që thuajse nuk njeh kurrë ditë pushimi dhe paguhet mjerueshëm dhe, megjithëkëtë, nuk ndihet, por i shërben me gjithçka mundet familjes dhe shoqërisë, është polici që përballet ditë-natë me krimin dhe kriminelët, me dhunën fizike dhe rreziqet, me denigrimin e pamoral që i bëjnë jo rrallë politikanët ligjshkelës, mediat e papërgjegjshme dhe klounët e pavlerë të shfaqjeve televizive.
Njeriu i Vitit është intelektuali i heshtur, por i palodhur, që ia ka kushtuar një pjesë të madhe të jetës së tij studimeve, hulumtimeve, mësimdhënies, shkrimeve e botimeve shkencore; është mjeku dhe infermieri që iu përgjigjet me shpejtësi, profesionalizëm dhe stërmundim nevojave shëndet- dhe jetëshpëtuese të qytetarit pa kërkuar dhe pa pranuar shpërblime të tjera veç rrogës së varfër që i ofron qeveria; është punonjësi i zjarrfikëses që vë në rrezik jetën e vet për të shpëtuar jetët dhe pasuritë private apo shtetërore; është prokurori apo gjyqtari (oh, sa të paktë janë këta!) që njeh dhe vepron vetëm në bazë të ligjit pavarësisht kush është i dëmtuari dhe kush është i akuzuari etj.etj.
Antinjeriu i Vitit, dhe i viteve, nuk ka dyshim se gjendet kudo e kurdo midis nesh. Ky, me sjelljet dhe veprimet e veta i shkakton qytetarit shqiptar dhe shoqërisë tonë dëme të mëdha, shpesh të pandreqshme dhe afatgjata.
Të tillë individë i gjejmë në rrugë, por edhe në poltronët politikë, mediatikë dhe të biznesit. Si të tillë mund të jenë gangsterët kokëboshë, por të rrezikshëm, që na shfaqen herë pas here në rolin e trafikantit të drogës, femrave apo armëve, shkelësit përsëritës të rregullave të trafikut rrugor apo të rendit shoqëror, grabitësit të bankës apo të pronave, dhunuesit të rendit nëpër stadiume e qendra publike, ashtu si dhe dhunuesit të familjeve, kryesisht bashkëshorteve të tyre.
Mirëpo, antinjerëzorët më të dëmshëm i kemi dhe i gjejmë në radhët e “elitave”, qofshin ato politike, ekonomike apo mediatike.
Zyrtari shtetëror që spekulon me tenderat dhe paratë e buxhetit të shtetit; punonjësi i doganës, ai i tatim-taksave dhe të ngjashmit e tyre që bëjnë marrëveshje kriminale me botën e biznesit duke shmangur derdhjen e detyrimit në arkën e shtetit sipas motos “më jep të të jap”; drejtuesi dhe punonjësi i bashkisë, i policisë dhe i drejtësisë që e kthen zyrën shtetërore në “sallë ankandesh” dhe e përdor kërkesën e ligjit për fitime vetjake; biznesmeni që shmang pagimin e taksave dhe korrupton zyrtarët e pamoralshëm shtetëror, që paguan mjerueshëm ose nuk paguan fare punëtorin mundimmadh; drejtuesi mediatik që e përdor median si mjet pengmarrës dhe gjobëvënës kundrejt zyrave dhe zyrtarëve shtetëror me qëllim shtrëngimi të paguaj kundrejt heshtjes për ligjshkeljet e veta; drejtuesi apo pronari mediatik që i ofron dhe i shet popullit çdo ditë dhe pa pushim veset dhe perversitetet si virtyte dhe arritje artistike, lakuriqësinë dhe pornografinë si suksese dhe shembuj për t’u ndjekur; politikani pa moral që mashtron, shpif e përgojon cilindo që beson se i bëhet pengesë në rrugën drejt pushtetit, që krimet e veta të panumërta i shpall vepra të moralshme e të ligjshme ndërsa tek të tjerët sheh vetëm monstruozitete dhe paligjshmëri etj.etj.
Le të shpresojmë që këtë vit e në vazhdim të na shtohen sa më shumë “Njerëzit” dhe të na pakësohen “Antinjerëzit”!
