“Amerika na i ka mbyllur dyert”, kështu shkruan ambasadori i Kosovës në ShBA në raportin dërguar ministres së Punëve të Jashtme Donika Gërvallës.
Në raport, ambasadori i Kosovës, Ilir Dugolli, thotë se Amerika është larg, më brutale se mund të mendohet në Prishtinë.
Gazeta Nacionale e ka siguruar dokumentin e titulluar “Raport i shkurtër mbi vitin e parë të detyrës në ShBA” të përgatitur nga ambasadori Ilir Dugolli, dhe i cili i dërgohej shefes së diplomacisë tonë, znj. Donika Gërvalla Schëarz.
Aty z. Dugolli thotë se do të ndajë “disa reflektime të shpejta” mbi punën e bërë përgjatë një viti derisa shprehet që detyrën si ambasador “nuk e ka pranuar me dëshirë për një numër arsyesh, si objektive ashtu edhe personale.”
Por, në pjesën ku shkruan për “Menaxhimin e Ambasadës” gjejmë fjalë që, më e pakta, mund të cilësohen si skandaloze për një diplomat të nivelit të lartë dhe që potencialisht mund të rrezikojë edhe më shumë raportet mes ShBA-ve dhe Kosovës.
Aty, ambasadori Dugolli tregon për “kufizimet e shumta” me të cilat është përballur Ambasada përgjatë vitit për të cilin reflekton. Dhe më poshtë, është fjalia jashtëzakonisht problematike:
“Përderisa mund të ketë ambasadë tjetër të RKS-së që ka funksionuar me nivel të njëjtë të stafit, vështirë të ketë rast tjetër ku shkrihen në një vend mbështetja në një diplomat të vetëm, pa staf vendor, me trajtim nga shteti nikoqir që është larg më brutal se që mund të perceptohet në kryeqendër…
Shteti nikoqir është ShBA-ja, dhe ambasadori Dugolli po ankohet se Amerika është larg më brutale se sa që perceptohet në Prishtinë. Pra, edhe më brutale se sa që mund ta mendojnë kryeministri Albin Kurti e ministrja Donika Gërvalla.
Në pjesën ku flet për “Komunikimin me shtetin nikoqir” ai tregon se si “Në nivelin e shteteve dhe të autoriteteve lokale (përjashto Uashingtonin dhe ato që janë realizuar si pjesë e vizitave të nivelit të lartë), ka qenë e pamundur të realizohet çfarëdo takimi…”
Pikërisht për vizitat, ambasadori flet edhe në pjesën e fundit të këtij raporti tronditës.
Ai thotë që një opsion mbetet “riaktualizimi i kërkesave për biseda telefonike me Sekretarin Blinken dhe Këshilltarin e Sigurisë Kombëtare Sullivan përmes presionit të njëkohshëm” nga ambasada që drejtohet nga Dugolli dhe nga ajo në Prishtinë që drejtohet nga Jeff Hovenier.
Kryeministri i Kosovës Albin Kurti aktualisht po përballet me një presion të jashtëzakonshëm për formimin e Asociacionit të Komunave me Shumicë Serbe.
Pikërisht Ambasada e ShBA-ve në Prishtinë e ka thirrur një takim për datën 31 janar në të cilin do të diskutohen me politikanë dhe shoqëri civile modalitetet e themelimit të Asociacionit.
Kurti ka thënë se nuk është thirrur fare në këtë takim.
Kurti në një intervistë për REL të publikuar dje u shpreh se ishte paralajmëruar për mundësinë e zvogëlimit të mbështetjes ndërkombëtare.
m.b./dita
