Ndonëse i dha PSG-së titullin kampion, trajneri Galtier do të largohet nga drejtimi i skuadrës këtë verë, pasi drejtuesit duket se nuk janë bindur nga puna e tij. Mediat franceze e japin të sigurt shkarkimin e Galtier, teksa kanë nisur të qarkullojnë edhe emrat e kandidatëve që mund ta zëvendësojnë, teksa lista është e gjatë dhe përmban emra si Luis Enrique, Zidane, Mourinho e Thiago Motta.
Megjithatë së fundi ka fituar terren ish-trajneri i Bayernit të Mynihut, Julian Nagelsmann, i cili është i papunë dhe në pritje të ofertave. Sheiku Al Khelaifi duket se e ka takuar personalisht gjermanin dhe i ka propozuar drejtimin e PSG-së, bashkë me premtimin për të investuar për ndërtimin e një skuadre të aftë për të garuar në nivele të larta. Palët kanë rënë parimisht dakord, megjithatë dy javët e para të qershorit do të jenë ato që do të përcaktojnë edhe vendimin final të palëve.
Edhe Monaco shkarkoi trajnerin Philipe Clement një ditë pasi humbi në shtëpi kundër Toulouse (1-2) në javën e fundit të Ligue 1 dhe pasi mbeti jashtë kompeticioneve europiane. Në një publikim në faqen zyrtare, Monaco bëri me dije këtë të dielë se Clement nuk do të jetë më në krye të skuadrës së tyre. 49-vjeçari belg mori drejtimin e Monacos në janar 2022 dhe pas sezonit zhgënjyes e mbyll këtu këtë eksperiencë.
