Në Durrës po ndërtohen 3200 apartamente, shumica për të prekurit nga tërmeti i 26 Nëntorit.
Teksa pa nga afër procesin e rindërtimit në qytetin bregdetar, zv/kryeministrja njëherësh edhe Ministre e Energjisë dhe Infrastrukturës, Belinda Balluku tha se 2 pallate në lagjen 17 pritet të përfundojnë brenda Dhjetorit.
“Në Durrës po ndërtohen 3200 njësi, shumica për të dëmtuarit nga tërmeti, por edhe për ata për banesa sociale”.
Balluku u ndal edhe tek investimet në qytetin bregdetar dhe portin e ri të Durrësit.
“Projekti i water front-it të Durrësit ka përfunduar totalisht. Jemi gati, shumë shpejt kalojmë në parlament.
Po avancojmë edhe me Portin e ri të Durrësit i cili do të ndërtohet në zonën e Porto Romanos dhe prej aty do të nisë hekurudha e cila do të lidhë Portin e Durrësit, me portin e Thatë të Prishtinës”.
Zv/kryeministrja Balluku tha se procesi i rindërtimit zë një peshë të rëndësishme edhe në buxhetin e vitit 2023.
