Vijimi i kontrolleve antikanabis ka çuar në zbulimin e 742 bimëve narkotike kanabis, të cilat u gjetën të kultivuara në Malësinë e Krujës.
Autoritetet e policisë bëjnë me dije se në pranga është vënë një 32-vjeçar si autor i dyshuar i kultivimit i të paktën 150 prej tyre, të cilat janë gjetur në vendin e quajtur Çinar, ndërkohë që në kërkim është shpallur edhe vëllai i tij.
Më parë, në kuadër të këtij operacioni, janë gjetur dhe asgjësuar 17 213 bimë narkotike kanabis.
Shërbimet e Komisariatit të Policisë Krujë kanë vijuar intensivisht kontrollet në Malësinë e Krujës dhe në fshatra të ndryshme të rrethit, duke përdorur dhe dronë, me qëllim parandalimin evidentimin dhe goditjen e veprimtarisë kriminale të kultivimit të bimëve narkotike.
“Si rezultat i kontrolleve të ushtruara në kuadër të fazës së 30-të të megaoperacionit policor antikanabis të koduar “Territor i pastër”, në Malësinë e Krujës, u gjetën të kultivuara 742 bimë të dyshuara narkotike cannabis sativa, të cilat u asgjësuan me anë të djegies.
Në vijim të veprimeve u arrestua njëri prej autorëve të dyshuar për kultivimin e 150 bimëve në vendin e quajtur Çinar, shtetasi G. L., 32 vjeç, si dhe u shpall në kërkim vëllai i tij, shtetasi H. L., 29 vjeç, të dy banues në fshatin Bura, Nikël”, thuhet në njoftimin e policisë.
Megaoperacioni policor antikanabis i koduar “Territor i pastër”, vijon.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
p.k\dita
