Historia e gjeneralit kroat të Bosnjes që vrau veten me helm në sallën e gjykimit në Hagë sapo dëgjoi dënimin me 20 vjet

Nga Dori Xhima

Slobodan Praljak ishte një ish-gjeneral kroat i Bosnjës. Praljak u bë i njohur botërisht më 29 nëntor 2017, kur kreu vetëvrasje spektakolare dhe dramatike drejtpërdrejt në sallën e Gjykatës Penale Ndërkombëtare për ish-Jugosllavinë (ICTY) në Hagë.

​Para luftës ai kishte tre diploma universiteti (inxhinieri, filozofi/sociologji dhe arte teatrale) dhe punonte si regjisor teatri e televizioni në Zagreb.
​Gjatë luftës, nga 1992 deri në 1995 bë një nga komandantët kryesorë të Këshillit të Mbrojtjes Kroate (HVO), që ishte forca ushtarake e kroatëve të Bosnjës.

Ai u mbajt përgjegjës për urdhrin ose mospengimin e shkatërrimit të Urës së Vjetër të Mostarit (Stari Most) në nëntor 1993, si dhe për krime lufte ndaj popullsisë civile myslimane (boshnjake) gjatë konfliktit kroato-boshnjak.

Më 29 nëntor 2017, Paneli i Apelit i Gjykatës së Hagës po lexonte vendimin përfundimtar për rastin e tij dhe pesë liderëve të tjerë kroatë të Bosnjës. Sapo trupi gjykues konfirmoi dënimin e tij me 20 vjet burg për krime lufte dhe krime kundër njerëzimit, Praljak u ngrit në këmbë dhe deklaroi me zë të lartë:
​”Slobodan Praljak nuk është kriminel lufte! Me përçmim e refuzoj vendimin tuaj!”.

Menjëherë pas kësaj, ai nxori një shishe të vogël nga xhepi, e piu përmbajtjen e saj dhe i tha trupit gjykues: “Piva helm”.

Sessioni u ndërpre menjëherë. Ai u dërgua me urgjencë në spitalin e Hagës, ku vdiq pak orë më vonë. Hetimet holandeze më pas konfirmuan se lënda që piu ishte cianid potasi.

DITA