Vijon puna për rehabilitimin e rrugës në fshatin Malasej, Njësia Administrative Gostimë nga e cila përfitojnë rreth 3500 banorë. Sekretari i Përgjithshëm i PS Damian Gjiknuri bashkë me Kryetarin e Bashkisë Cërrik Andis Salla inspektuan punimet në këtë rrugë, që është një tjetër premtim i mbajtur për banorët e zonës që e kishin kërkuar prej kohësh këtë investim.
Gjiknuri që është njëherësh dhe drejtues politik i qarkut u shpreh se ky është një tjetër premtim i mbajtur nga Bashkia e Cërrikut. “Më vjen mirë që Bashkia e Cërrikut dëgjoi një kërkesë të kahershme të banorëve. Janë 3500 njerëz që preken nga kjo vepër në kuptimin pozitiv që lidhet me rrugën nacionale. Është një vlerësim i punës së kryetarit të bashkisë, angazhimi i tij. Pikërisht për këto arsye ky jam i bindur që e meriton mbështetjen e njerëzve sepse e jep fjalën dhe e mban. Mbi të gjitha duhet thënë që këto janë investime të mirëadministruara nga fondet e Bashkisë së Cërrikut”, tha Gjiknuri.
Numri dy i socialistëve siguroi se Bashkia e Cërrikut do të vazhdojë të ketë mbështetjen e vazhdueshme të qeverisë shqiptare. “Janë vepra që nuk janë të fundit. Jam i bindur që do të vazhdojnë. Andi ka treguar veten si një njeri që di të bëjë projekte, di të komunikojë me autoritetet në Tiranë, ka ide për zhvillimin e qytetit. Unë ju garantoj këtu, si drejtues politik, bashkia e Cërrikut do të vazhdojë të ketë mbështetjen e vazhdueshme të qeverisë shqiptare. Ca me fondet e tij si bashki, patjetër dhe qeveria me fondet e tjera më të mëdha për vepra të tjera më të mëdha”, shtoi ai.
Drejtuesi politik Damian Gjiknuri shprehu bindjen se qytetarët e Cërrikut do të dinë të vlerësojnë ata që punojnë. “Jam i bindur që qytetarët e Cërrikut do dinë t’i vlerësojnë këto se janë gjëra pune. Ne nuk merremi me fjalë. Ne nuk duam të bëjmë ato betejat politike të Tiranës këtu. Ne duam që atë që themi ta bëjmë në dobi të qytetarëve të Cërrikut. Kështu që kryetar, ke përgëzime bashkë me stafin me të gjithë ekipin. Ta gëzoni dhe mezi pres të vij bashkë me ju ta inaugurojmë këtë rrugë që jam i bindur do të jetë dhe një rrugë shumë e bukur sepse kjo krahinë është shumë e bukur”, tha Gjiknuri.
