Gjykata e Lartë e SHBA-së vendosi sot në favor të Kalifornisë, e cila miratoi një ligj që synon të minimizojë vuajtjet e kafshëve në fermat e derrave. Ky ligj ka zemëruar prodhuesit e mishit të derrit, proshutës dhe mishrave të tjerë.
“Megjithëse Kushtetuta rregullon shumë çështje të rëndësishme, lloji i bërxollës së derrit që lejohet të shitet në Kaliforni nuk është në mesin e tyre”, tha gjyqtari Neil Gorsuch.
Vendimi i Gjykatës së Lartë, i mbushur me referenca kulinare dhe përshkrime të hapësirës së jetesës së derrave, ka të bëjë me një ligj të miratuar në vitin 2018 në Kaliforni, pas një nisme popullore që çoi në një referendum për këtë çështje.
Ligji ndalon shitjen në këtë shtet të mishit të derrit, nga derrat e rritur në hapësira shumë të kufizuara, raporton “Protothema”.
Industria e derrit shkoi në gjykatë, duke akuzuar Kaliforninë se dëshiron të imponojë vlerat e saj në shtetet e tjera. Vlen të theksohet se Kalifornia prodhon vetëm një pjesë shumë të vogël të mishit të derrit të konsumuar nga afro 50 milionë banorët e saj.
Përfaqësuesit e industrisë argumentuan se me këtë ligj, do të rriteshin kostot e prodhimit, dhe për rrjedhojë do të rriteshin çmimet e salsiçeve, mishit të pjekur. Por kryesisht, thanë ata, ligji shkel Kushtetutën e SHBA, e cila ndalon çdo shtet të miratojë ligje që prekin transaksionet tregtare midis tyre.
Çështja shkoi në Gjykatën e Lartë, e cila hodhi poshtë argumentet e industrisë së derrit. “Ne jemi të ftuar të krijojmë dy kushte të reja që do të kufizonin aftësinë e shteteve për të rregulluar tregun e tyre të brendshëm dhe ne e refuzojmë atë ftesë”, shkroi Gorsuch në emër të Gjykatës.
j.l./ dita
