Gjashtë punëtore të fabrikës së telave në Bathore, përfunduan në spital gjatë ditës së enjte, pasi shfaqën probleme me frymëmarrjen, kryesisht asfiksi nga ambienti i mbyllur dhe gazrat oksidues nga metalet e rënda të lëndës së parë.
Policia nisi hetimet, teksa mjekët thanë se rrezikshmëria nga toksikimi ka kaluar pas teprapisë intensive dhe lavazhit. Punëtoret besohet se mund të jenë helmuar edhe nga ndonjë solucion gjatë punës, megjithatë, rezultati përfundimtar pritet nga ISHP.
Ndërkohë Inspektorati Shëndetësor Shtetëror ka pezulluar punimet në fabrikën e prodhimit të kabujve, deri në daljen e analizave. Në fabrikën e telit në Bathore ka rreth 3 mijë punonjës, jo vetëm burra, por edhe gra. Sipas dëshmive, kjo është hera e parë që ndodh. Deri tani nuk ka më punonjëse të tjera që kanë shfaqur probleme me rrugët e frymëmarrjes dhe hetimet janë ende aktive, teksa po pyeten edhe drejtuesit teknikë të firmës dhe administratorët.
