Hije skandali, autori i dyshuar i vrasjes në Elbasan duhet të ishte nën ruajtje, rezulton në ‘arrest shtëpie’

Marselo Arani, një nga autorët e dyshuar të vrasjes së biznesmenit Mondi Mëhalla në Elbasan, është një emër i njohur për drejtësinë, jo vetëm në Shqipëri, por edhe në Itali.

32-vjeçari ishte nën masën arrest shtëpie për pastrim parash, ndërkohë para rreth një viti më parë nga policia e Elbasanit ka arrestuar Marselo Aranin, i akuzuar për pastrim parash.

Pjesë nga njoftimi i policisë:

Dhe u shpallën në kërkim shtetasit M. A., 32 vjeç, banues në Elbasan, ndërkohë që ishte në masën e sigurisë “Arrest në shtëpi” për një tjetër vepër penale, si dhe A. K., 35 vjeç, banues në Laç, (të dyshuar si autorë të vrasjes), për veprat penale “Vrasje me paramendim”, kryer në bashkëpunim, “Prodhimi dhe mbajtja pa leje e armëve, armëve shpërthyese dhe municionit” dhe “Largimi i të burgosurit nga vendi i qëndrimit”.

Kujtojmë se në qershor të këtij viti, Prokuroria e Elbasanit i sekuestroi Marselo Aranit 14 pasuri në pronësi të tij.

Arani rezulton i dënuar me vendim të formës së prerë në Itali, për veprën penale të shfrytëzimit të prostitucionit.

Gjatë hetimeve është provuar se ai ka kryer veprimtari kriminale në territorin italian.

Pasuritë e konfiskuara:

Një apartament në Durrës;

11 automjete të markave të ndryshme (Mercedes-Benz, Audi SQ7, Maserati, BMW, Suzuki, Fiat, Volkswagen, Jeep);

Një motoçikletë BMW;

Një biznes për tregti dhe qiradhënie makinash në Elbasan.

Çfarë është masa arrest shtëpie:

Sipas nenit 237: me vendim gjykate, të pandehurit i urdhërohet të mos largohet nga banesa e tij (ose një vend i caktuar) dhe të qëndrojë aty, sipas kushteve që përcakton gjykata.

Kujtojmë se Marselo Arani, 32-vjeç, dhe Armando Kola, 35-vjeç janë shpallur në kërkim si autorë të vrasjes së biznesmenit Edmond Hyka alias Mondi Mëhalla mbrëmjen e së dielës në Elbasan.

Në pranga janë vënë dy të tjerë, 32-vjeçari Xhino Ago, i dyshuar si bashkëpunëtor, pasi i ka dhënë automjetin njërit prej autorëve, si dhe 52-vjeçari Kujtim Pisha, roja i karburantit “Xhaxhi Oil” ku ndodhi ngjarja –  shkruan Vox News.