Mbytjet apo vdekjet në plazhe për shkak të atakut kardiak dhe temperaturave të larta po bëhen të zakonshme. Një rast i ngjashëm u raportua mbrëmë pas Durrësit, edhe në qytetin e Lezhës. Sipas policisë vendore, në plazhin Tale, B.Xh, rreth 52 vjeç, banues në Kamëz, Tiranë, sapo ka rënë në kontakt me ujin në anë të detit nuk është ndier mirë.
Policia bën me dije se roja bregdetare dhe pushuesit e tjerë e kanë ndihmuar duke i dhënë ndihmën e parë dhe menjëherë është transportuar në Spitalin rajonal, por ka ndërruar jetë.
Ngjashëm si me rastin e parë, sërish dyshohet se 52-vjeçari ka pësuar arrest kardiak. Grupi hetimor vijon punën për përcaktimin e saktë të humbjes së jetës.
