Pas eliminimit në gjysmëfinale të Champions League, ku u mundën me rezultatin e përgjithshëm 5-1 nga Manchester City, te Real Madrid tashmë po vihet në pikëpyetje e ardhmja, më saktë ajo e trajnerit Carlo Ancelotti. Pas ndeshjes të së mërkurë, sulmuesi i madrilenëve, Vinicius Junior është pyetur nëse tekniku duhet të qëndrojë në krye të stolit të “Los Blancos”.
Braziliani u shpreh i qartë në mendimin e tij dhe theksoi se Ancelotti duhet të vazhdojë të jetë trajneri i Real Madrid. “Sigurisht që ai duhet të qëndrojë dhe të vazhdojë të jetë trajner i Realit. Sigurisht”, tha Vinicius Junior. Edhe lojtarë të tjerë si Kros, Modriç, Benzema, Kurtua i kanë dalë në krah trajnerit, pavarësisht humbjes katastrofike që dhemb. Vetë tekniku italian në konferencë deklaroi se nuk do largohej, pasi edhe presidenti Perez ishte shprehur dy javë më parë për rinovim kontrate dhe vazhdimësinë e tij në pankinë.
