Real Madridi i dha lamtumirën Ligës së Kampionëve me një humbje të madhe (4-1) ndaj Manchester City të Pep Guardiolës. Një disfatë që tregon fundin e ciklit për një ekip që ka fituar gjithçka, por që në “Etihad” vërtetoi një rënie, të cilën Barça e kishte vënë në dukje tashmë me ato 14 pikë diferencë në La Liga.
Skuadra e drejtuar nga Carlo Ancelotti tregoi në ndeshjen e dytë gjysmëfinale të Ligës së Kampionëve të gjitha mangësitë që fshihnin përmbysjet e pamundshme karombolike të sezonit të kaluar. Disfata e thellë ndaj Manchester City la disa gjëra të theksuara nga pas. Duke filluar nga mefshtësia e trajnerit Carlo Ancelotti për të ndryshuar diçka gjatë lojës dhe përfunduar me “zhdukjen” e Karim Benzema. Media ka masakruar të gjithë skuadrën, duke shpëtuar vetëm portierin belg Curtois, i cili shmangu një rezultat edhe më të thellë, teksa u raportua se luajti i dëmtuar. Nën ‘gijotinë’ janë veteranët, teksa mësohet se presidenti Fiorentino Perez ka turfulluar jo pak në dhomat e zhveshjes për imazhin katastrofik të dhënë. Në syrin e ciklonit janë mbrojtja në bllok me Militao, Alaba, Caravajal e deri te sulmi dhe mesfusha me Vinicus, Modric, Kroos, Benzema apo Rodrigo.
Pep Guardiola kaloi dorën mbi fytyrën e tij me një qasje të guximshme. Si gjithmonë, Carlo Ancelotti i besoi gjithçka pritjeve të Courtois dhe aftësisë së lojtarëve të tij për të përfituar nga çdo gabim i kundërshtarit. Courtois e mbajti në këmbë për 20 minuta me duar të pabesueshme, por gabimi i City nuk erdhi kurrë. Anglezët e pushtuan Real Madridin me presion mbytës, çka të bardhët nuk mundën ta përballonin. Dëshmi për këtë është se Ederson nuk preku asnjë top në pjesën e parë. Italiani gjithashtu nuk kishte aftësinë për të ndryshuar lojën si në raste të tjera. “Magjia” si trajner iu zhbë në “Etihad”.