Anëtarësimi i Shqipërisë në Bashkimin Evropian mund të mos u japë shqiptarëve menjëherë të drejtën e pakufizuar për të punuar në çdo shtet anëtar.
Komisioni Evropian pret që zgjerimi i ardhshëm të shoqërohet me masa tranzitore për lëvizjen e lirë të punëtorëve, të ngjashme me ato që janë përdorur në zgjerimet e mëparshme.
Në tre raundet e fundit të zgjerimit, këto masa lejuan hapjen graduale të tregjeve të punës për qytetarët e shteteve të reja. Në analizën e tij të re, Komisioni thotë se mund të pritet një qasje e ngjashme edhe në zgjerimet e ardhshme.
Sipas modelit të përshkruar, çdo shtet anëtar mund të ketë fleksibilitetin të vendosë nëse do të aplikojë menjëherë rregullat evropiane të lëvizjes së lirë apo do të përdorë përkohësisht masa kombëtare për aksesin e punëtorëve nga vendet e sapo-anëtarësuara.
Komisioni parashikon gjithashtu mundësinë që, përpara anëtarësimit, të vlerësohet ndikimi që hapja e tregut të punës ndaj qytetarëve të një vendi kandidat do të kishte mbi shtetet ekzistuese.
Kjo nuk do të thotë se është marrë një vendim për kufizime ndaj shqiptarëve. Kohëzgjatja dhe forma e çdo mase do të varen nga negociatat dhe Traktati i ardhshëm i Anëtarësimit.
Por dokumenti e bën të qartë se lëvizja e lirë e punëtorëve është një nga fushat ku Brukseli po përgatitet për masa tranzitore.
Vetë Komisioni, në prezantimin e paketës së 6 tetorit, konfirmoi se marrëveshje të tilla mund të përdoren kur është e nevojshme për lëvizjen e punëtorëve dhe shërbimeve.
Kjo do të thotë se për qytetarët shqiptarë data e anëtarësimit në BE dhe data e aksesit të plotë në të gjitha tregjet evropiane të punës mund të mos jenë domosdoshmërish e njëjta.
j.l./ dita
