Llogaritë dhe faqet e rrjeteve sociale kanë përhapur një lajm lidhur me shoqërimin e një protestueseje nga Policia e Shtetit, duke pretenduar se masa është marrë “nën urdhrat e Iris Luarasit”. Për më tepër, pretendimi u shoqërua me një imazh ku fytyra e Luarasit është vendosur me fotomontazh mbi trupin e një gruaje tjetër.
Përmes një reagimi publik, deputetja e Partisë Socialiste, Iris Luarasi, e ka cilësuar këtë raportim një “manipulim të shëmtuar” dhe “dhunë digjitale”. Luarasi thotë se shoqërimi i protestueses nga policia nuk ka asnjë lidhje me të, por lidhet me dëmtimin e automjetit privat të deputetes tjetër, Ilva Gjuzi.
Prapaskena e këtij manipulimi lidhet me tensionet e një dite më parë pranë Parlamentit, ku disa aktivistë dhe protestues u përballën me deputetë gjatë hyrjes së tyre në Kuvend. Gjatë këtij incidenti, Luarasi u ndoq dhe u shënjestrua nga disa protestuese me thirrje e akuza verbale pranë një qendre tregtare gjatë rrugës për në seancë.
Pas përplasjes verbale, në rrjet filluan të qarkullojnë pretendime se policia kishte ndaluar njërën nga aktivistet me urdhër të Luarasit. Por veprimi i policisë erdhi pas dëmtimit të makinës private të deputetes Ilva Gjuzi. Montimi i imazhit dhe lidhja e rreme e ngjarjes u përdorën më pas për të ushqyer dezinformimin në rrjetet sociale.
Reagimi i plotë i Iris Luarasit:
FAKE NEWS DHE MANIPULIM I SHËMTUAR:
”Protestuesja është shoqëruar në komisariat lidhur me sulmin ndaj automjetit privat të deputetes Ilva Gjuzi dhe dëmtimin e pasqyrës së tij dhe s’ka lidhje fare me mua.
Deri më tani nuk kam ndërmarrë asnjë hap ligjor ndaj personave që më denigruan dje. Ata që përdorin manipulimin dhe lajmet e rreme nuk i shërbejnë protestës: e bëjnë pis atë.
Përdorimi i fytyrës sime mbi trupin e një gruaje tjetër është poshtërim publik dhe dhunë digjitale ndaj një gruaje.
Kur kësaj i shtohet edhe një lajm i rremë, nuk kemi më as informim, as satirë dhe as gazetari. Gazetaria kërkon të vërtetën, kurse qelbësirllëku ushqehet me gënjeshtrën. Mos i ngatërroni. Dhe qelbësirllëku nuk quhet gazetari”.
