Ndërsa kryeministri Rama postoi video nga një takim, sipas tij, me studentët që nuk besojnë te gurët, një grup i madh studentësh kanë zhvilluar ditën e sotme te Politekniku një mbledhje me dyer të mbyllura.
Ata kanë njoftuar krijimin e Lëvizjes Studentore Kombëtare (LSK), në të cilin janë zgjedhur përfaqësues në çdo fakultet.
Sipas një njoftimi të mëparshëm, janë anëtarësuar mbi 2000 studentë nga 34 universitete të Shqipërisë. 500 prej tyre kanë marrë pjesë në mbledhjet përkatëse dhe 10 fakultete deri tani kanë zgjedhur delegatët e përkohshëm – thanë organizatorët.
“Ky organizim, nuk ka kryetar, e as ne nuk jemi të tillë. Ne nuk duam të flasim sot në emrin tuaj, por t’ju ftojmë si shokët tanë, të na bashkoheni”, thuhet në deklaratën e publikuar.

Ata thonë se ky angazhim do t’i shërbejë orientimit të mëtejshëm të protestës.
“Në vijim, do të paraqesim për diskutim publik propozimet tona. Angazhimi ynë në këtë debat buron nga e drejta dhe përgjegjësia për të ndikuar rregullat që përcaktojnë të ardhmen e brezit tonë, pa zëvendësuar kërkesat e tjera të protestës qytetare.
Ky angazhim do të shërbejë si një instrument i rëndësishëm për orientimin e mëtejshëm të lëvizjes studentore dhe qytetare”, vijon deklarata.
Një ndër thirrjet e tyre në deklaratë është hetimi për reagimin e policisë gjatë protestave që prej 13 tetorit.
Pas mbledhjes te Politekniku ata kanë pritur daljen e Ramës nga Akademia e Arteve ku u zhvillua Asambleja e PS së Tiranës.
Te shkallët e Akademisë, ndërsa shkonte drejt makinës, kryeministri është përballur me këtë situatë:
