I drejtohet samitit si “G19”, Zelensky: Lufta duhet të përfundojë tani

Presidenti ukrainas, Volodymyr Zelensky u tha liderëve botërorë në samitin e G20 në Bali se lufta e Rusisë “duhet të përfundojë tani”.

Ai kërkoi zgjatje të një marrëveshjeje të rëndësishme të eksportit të grurit që do të skadonte së shpejti.

Zelensky u shfaq në një video-fjalim drejtuar udhëheqësve të mbledhur në ishullin indonezian.

Vladimir Putin, udhëheqësi i Rusisë dhe anëtar i G20, refuzoi të marrë pjesë dhe dërgoi ministrin e tij të jashtëm Sergei Lavrov në vend.

Në fjalimin e tij, Zelensky tha: “Jam i bindur se tani është koha kur lufta shkatërruese ruse duhet dhe mund të ndalet”.

Ai përshkroi një sërë strategjish, duke përfshirë sigurimin e sigurisë bërthamore dhe ushqimore, përfundimin e armiqësive dhe parandalimin e përshkallëzimit.

Ai vazhdimisht iu drejtua liderëve si “G19”, duke përjashtuar qartë Rusinë.

Kryesorja ndër kërkesat e tij ishte një zgjatje e asaj që njihet si iniciativa e për drithërat e Detit të Zi, e cila u nënshkrua në korrik midis Kombeve të Bashkuara dhe Rusisë.

Ajo ka siguruar që eksportet e ushqimeve të bllokuara në portet e Ukrainës nga luftanijet ruse mund të dërgohen jashtë.

OKB thotë se që nga fillimi i marrëveshjes, 10 milion ton drithë dhe ushqime të tjera janë eksportuar me sukses, duke parandaluar një krizë globale ushqimore.

Por marrëveshja skadon më 19 nëntor dhe  Zelensky tha se “marrëveshja duhet të zgjatet për një kohë të pacaktuar, pa marrë parasysh se kur përfundon lufta”.

“E drejta për ushqim është një e drejtë themelore e çdo personi në botë”, tha ai, duke propozuar zgjerimin e marrëveshjes në porte të tjera në rajonin e Mykolaiv.

Në këmbim të lejimit të Ukrainës për të dërguar ushqime, Rusia ka këmbëngulur që sanksionet perëndimore të hiqen në mënyrë që të mund të eksportojë ushqimin në tregjet botërore pa asnjë pengesë.

Zelensky akuzoi gjithashtu Rusinë se po përpiqet të “ta kthejë të ftohtin në një armë kundër miliona njerëzve” duke bombarduar infrastrukturën kryesore të energjisë ukrainase me afrimin e dimrit.

j.l./ dita