​”I gjetëm rusët!”

Nga Orgen Peci

Pas grekëve e iranianëve, orët e fundit qeveria ka deklaruar publikisht se pas protestuesve “fshihen rusët”. Përgjigjja që vjen nga rruga është një leksion i pastër i ironisë politike.

​Në protestën e sotme, mes qindra pankartave, spikati njëra që përmbledh më së miri këtë absurditet.

​Pankarta e shfaqur në shesh mban një titull të dyfishtë: në krye shkruhet në cirilikë “ИДИОТЫ” (Idiotët), ndërsa poshtë pason mesazhi i prerë: “I GJETËM RUSËT”.

Në foto janë kryeministri Edi Rama dhe rrethi i tij i ngushtë i propagandistëve mediatikë të rreshtuar “krah për krah” me Sergey Lavrov.

Duke përdorur gjuhën ruse dhe simbolet që vetë qeveria përpiqet t’u faturojë protestuesve, qytetarët po thonë: Nëse doni të gjeni ndikime autokratike, mendësi putiniste të shtypjes së opozitës dhe arrogancë ndaj qytetarëve, mos shikoni nga sheshi, por kthejeni kokën nga zyrat e pushtetit.

Përfshirja e figurave të njohura mediatike në pankartë godet drejtpërdrejt instrumentet që qeveria po përdor për të legjitimuar përrallat e saj. Ata që çdo natë në studio televizive përkthejnë pakënaqësinë popullore në “skenarë destabilizimi”, sot e panë veten në rolin e vërtetë. Ushqyes të një propagande që pandeh se qytetarët nuk kanë kujtesë.

Ironia shkon më tej. Vetë metodat e sulmit ndaj protestave në Shqipëri – duke i shpallur ato si “të frymëzuara nga jashtë” – janë një kopje e shëmtuar e metodave që përdor Kremlini për të shtypur çdo zë kritik brenda Rusisë.

Foto daton kur Kryeministri, nën petkun e Kryesuesit të OSBE-së, shkoi në Moskë për t’u takuar me “gogolin” e sotëm, Sergey Lavrov. Një takim nga i cili, siç thonë diplomatët, kryeministri ynë doli “i rruar e i qethur”, i zhveshur nga çdo peshë politike përballë dhelbrës së vjetër të Kremlinit.

​Diletantizmi nuk mbaronte këtu. Në atë takim, në vend që të ekspozohej trupa serioze e OSBE-së dhe ambasadori ynë që i takonte me protokoll të ishte aty, kryeministri mori me vete një rreth privat. Shteti u trajtua si dyqan personal, pa peshë, e pa seriozitet. Ndaj sot, kur po kjo trupë akuzon protestuesit për “lidhje me rusët”, pankarta e sheshit thjesht u kujton atyre se kush ka qëndruar vërtet përpara Lavrovit si nxënës i prapambetur klase.

Dita