Institucionet shpenzuan 3.8 milionë euro për bileta avioni në vitin 2025

Institucionet publike në Shqipëri shpenzuan rreth 377.6 milionë lekë, ose afërsisht 3.8 milionë euro, për bileta të transportit ajror ndërkombëtar gjatë vitit 2025, sipas të dhënave të raportit vjetor të Agjencisë së Prokurimit Publik.

Shifra shënon rritje prej 8.66% krahasuar me vitin 2024, kurse vlera totale e procedurave të përfunduara me fitues për blerjen e biletave ajrore ishte 347.5 milionë lekë.

Rritja e fondit vjen paralelisht me zgjerimin e numrit të prokurimeve, përmes sistemit dinamik të blerjeve të biletave të transportit ajror ndërkombëtar.

Në vitin 2025, numri total i procedurave arriti në 3,134, nga 2,856 në vitin 2024, duke shënuar rritje prej 9.74%.

Ndërkohë, procedurat e përfunduara me fitues u rritën në 2,847, nga 2,592 një vit më parë, ose 9.84% më shumë.

Sistemi dinamik i blerjeve përdoret nga autoritetet kontraktore si mekanizëm i thjeshtuar për sigurimin e biletave ajrore ndërkombëtare për udhëtime zyrtare.

Ai është i hapur për të gjithë operatorët ekonomikë të regjistruar në sistemin elektronik të prokurimit dhe me aktivitet të lidhur me transportin ajror ndërkombëtar.

Sipas raportit, procedurat e biletave përbëjnë rreth 14.5% të totalit të procedurave të përfunduara me fitues gjatë periudhës janar–dhjetor 2025.

Megjithatë, pesha financiare e tyre mbetet e kufizuar, duke zënë vetëm rreth 0.3% të fondit total të prokurimeve publike për të njëjtën periudhë. Raporti vë në dukje gjithashtu anulimet në këtë kategori për arsye të ndryshme ku në 2025 ishin 286 procedura.

Rreth 41% e procedurave të anuluara lidhen me gabime ose mangësi në dokumentet e tenderit.

Një tjetër 36% e anulimeve rezulton nga mungesa e ofertave të përshtatshme në treg.

Pjesa e mbetur i takon arsyeve si rrethana të paparashikueshme, ankesa të operatorëve ekonomikë ose mungesa së kërkesës nga autoritetet kontraktore.

Blerja e biletave i takon grupit të blerjeve me vlerë të vogël dhe sipas APP, kjo kategori në vitin 2025 shënoi 12,450 procedura me fitues duke ardhur në ulje në raport me vitin  2024.

Monitor.al