Një person i dyshuar është arrestuar për grabitjen e orës së dorës dhe varëses së pronarit të servisit të automjeteve në Kamëz të Tiranës, e ndodhur të dielën. Ndërkohë është shpallur në kërkim edhe bashkëpunëtori i tij. Burime zyrtare bënë me dije se në pranga ka rënë Saimir Korashi, ndërsa është shpallur në kërkim 32-vjeçari i identifikuar me inicialet Q.H., banues në Paskuqan. Të dy të rinjtë, në bashkëpunim me njëri-tjetrin, duke përdorur armë zjarri, kanë kanosur pronarin e biznesit, shtetasin Xh.S., të cilit i kanë marrë varësen prej floriri dhe orën që e kishte vendosur në dorë, nën kërcënimin e armës.
Gjatë kontrollit në banesat e autorëve të dyshuar, janë gjetur dhe sekuestruar në cilësinë e provës materiale: 3 ora dore, 2 varëse dhe 2 byzylykë floriri, me vlerë të konsiderueshme, të dyshuara të vjedhura, një sasi municioni luftarak, një aparat celular dhe automjeti që dyshohet se kanë përdorur autorët për t’u larguar pas vjedhjes. Po hetohet edhe për sulme të tjera të dhunshme të këtij grupi, duke krahasuar denoncimet e qytetarëve dhe gjurmët.
