Nga Enea Mërtiri
Deklarata e Sali Berishës për vijimin e hetimit pasuror ndaj Flamur Nokës, duke përmendur kontrollet rreth automjetit Range Rover, është një përpjekje e qartë për të relativizuar peshën e akuzave kryesore.
Në vend që të përqendrohet në pyetjen themelore ligjore “pse po hetohet Noka dhe cilat janë provat përkatëse”, zëri politik zgjedh të flasë rreth detajeve të dyta si kontrolli i pronësisë së një automjeti luksoz, nëse është i Lulit apo është i Mulit.
Kjo lëvizje gazetarisht njihet si “framing”, pra vendosja e fokusit te elementet dytësore për të zbehur rëndësinë e çështjes kryesore.
Hetimi pasuror dhe pyetjet rreth mënyrës së jetesës së një zyrtari publik janë çështje serioze, të cilat kanë për qëllim të vlerësojnë burimin e pasurisë dhe pajtueshmërinë me ligjin.
Kur këto procese politizohen apo shpërndahen me referenca të tjera, ekziston rreziku që publiku të çojë vëmendjen larg çështjes qendrore: pse një zyrtar po hetohet, dhe çfarë gjetje ka struktura ligjore.
Shqetësimi i qytetarëve nuk lind nga kontrolli i një automjeti, por nga transparenca dhe funksionimi i drejtësisë në trajtimin e zyrtarëve të lartë.
Kur debati zhvendoset tek detajet e jashtme, kjo shpesh shërben për të zbehur shqyrtimin e akuzave kryesore dhe për të rikthyer diskursin te tema që prekin më pak interesin publik real.
Në këtë dritë, përdorimi i këtyre “detajeve alternative” nuk duhet të shihet si një sqarim informativ, por si një strategji retorike për të relativizuar peshën e pretendimeve ligjore dhe për të zhvendosur fokusin nga çështjet që duhen sqaruar me fakte dhe prova.
Flamur Noka dyshohet për fshehje pasurie, pastrim parash dhe shpërdorim detyre. Përpos hetimit pasuror, ku Noka dyshohet se ka fshehur një vilë në Gjirin e Lalzit, deputeti i PD po hetohet për veprimtarinë e paligjshme gjatë kohës kur ishte drejtor i Bordit të Entit Kombëtar të Banesave (viti 2008), ku duke përdorur funksionin publik u dha katër banesa nga fondi i të pastrehëve në qytetin e Sarandës familjarëve të tij, dy vëllzerve që jetonin në Belgjikë, gruas së vëllait dhe motrës që jeton në Kamëz.
Në nëntor 2025, SPAK i kërkoi Ministrisë së Brendshme të gjithë praktikën e shpërndarjes së banesave për të pastrehët gjatë kohës kur Flamur Noka ishte kryetar i Bordit të Entit Kombëtar të Banesave. Gjithashtu, po hetohet edhe mënyrën dhe rrethanat se si familjarët e Flamur Nokës u bënë pronarë të banesave të të pastrehëve si dhe rolin e Nokës.
