Një 28-vjeçar është shpallur në kërkim nga Policia e Pogradecit, pasi dyshohet si autor i instalimit të 2 pajisjeve GPS, në automjetet që jepeshin me qira nga Eris Çekani, i cili dyshohet se ishte edhe shënjestra e ndonjë sulmi kriminal, me qëllim hakmarrjen, për shkak të konflikteve me grupin tjetër. I riu Sidni Syzo mësohet se është shpallur në kërkim për veprën penale “ndërhyrje të padrejta në jetën private”. Pajisja u zbulua nga roja i parkingut pranë Prokurorisë, që pikasi autorin e maskuar teksa vendoste një pako poshtë mjeteve dhe dyshoi se ishin bomba, duke njoftuar policinë vendore. Vetë Çekani ka dhënë dëshmi në polici, duke deklaruar se mendonte se pajisjen e përgjimit ia kanë vendosur persona me të cilët kishte pasur një përplasje fizike.
Eris Çekani nuk është një emër i panjohur për policinë shqiptare. Vetëm pak muaj më parë, 39-vjeçari është përfshirë në një sherr, ku të rinjtë, të cilët udhëtonin me dy makina, kanë ndjekur njëri-tjetrin si nëpër filma, deri në aksin rrugor Elbasan-Metalurgjik. Teksa kanë mbërritur në këtë rrugë, ata kanë përplasur dy mjetet me të cilat udhëtonin. Në këtë moment ka ndërhyrë Policia dhe në pranga ra Eris Çekani dhe Gledis Dikellari, 23-vjeç, të dy banues në Pogradec, e ndërsa 3 personat e tjerë janë larguar nga vend i ngjarjes me një makinë tjetër. Në bazë të dëshmisë që ai ka dhënë në polici bëhet fjalë se GPS është porositur pikërisht këto persona, megjithatë hetimet vijojnë pas shpalljes në kërkim të 28-vjeçarit, me qëllim zbardhjen plotësisht të këtij krimi.
