Ikën Di Maria dhe Paredes, por duket se tekniku Allegri e ka ‘jetën e gjatë’ në pankinën bardhezi. Pavarësisht se për të dytin sezon me rradhë Juventus del pa asnjë titull, sërish drejtuesit vendosin të konfirmojnë trajnerin Massimiliano Allegri. Ishte vetë administratori i deleguar i bardhezinjve, Maurizio Scanavino që nëpërmjet një konferencë për shtyp, theksoi se bashkëpunimin me teknikun livornez duke shtuar se e ardhmja e 55-vjeçarit nuk ka qenë kurrë në dyshim.
Kjo deklaratë ka nxitur reagimet e tifozëve të “Zonjës së Vjetër”, teksa pjesa më e madhe e tyre janë kundër projektit të Allegrit. Në rrjetet sociale, ata shpërthyen kundër drejtuesve të klubit torinez ndërsa shprehen të sigurt se edhe sezoni i ardhshëm me Allegrin në krye do të jetë një dështim, madje shkojnë deri në pikën ku e konsiderojnë si të përfunduar edhe pse ende nuk ka nisur.
Disa prej tifozëve, janë të bindur se me konfirmimin e Allegrit shumë futbollistë do të largohen nga skuadra dhe në fakt i pari që e ndërmorri një akt të tillë ishte Angel Di Maria. Këtë sezon, Juventus e mbylli në vend të shtatë, edhe pse duhet thënë se u penalizua me 10 pikë, por nga ana tjetër, bardhezinjtë dështuan në kompeticionet europiane si Champions League dhe Europa League ndërsa sezonin e ardhshëm do të marrin pjesë në Conference League.
