“Ishin të dehur në seancë”, Kuvendi përjashton me 10 ditë dy deputetët demokratë, Palokën e Leskajn

Kuvendi ka përjashtuar me 10 ditë deputetët demokratë Edi Paloka dhe Bujar Leskaj.

Vendimi erdhi pas përplasjes në seancën plenare mes tyre dhe kryeministrit Edi Rama ditën e djeshme gjatë votimit të buxhetit 2023.

Hyrja e Edi Ramës në sallën e Parlamentit u shoqërua me një përplasje verbale me deputetët e opozitës, Edi Paloka dhe Bujar Leskaj.

Dy deputetët demokratë, i kujtuan Ramës se nuk mund të flasë me gjuhë rrugaçi ndaj deputetëve të opozitës njësoj siç bëri në seancën e datës 10 nëntor kur i konsideroi “bedela”, “llaxore”, “të pafytyrë”.

Edi Paloka deklaroi dje se nuk ka qenë aspak i dehur siç deklarojnë socialistët por ka dashur të çojë në vend nderin e deputetëve demokratë.

“Absolutisht nuk kemi qenë të dehur. Por kemi qenë të revoltuar absolutisht po. Unë nuk isha në seancën e ditës së mërkurë, kur Edi Rama përdori një gjuhë rrugaçi në Parlament, ndaj kolegëve të mi parlamentarë. Sot kur ai hyri në seancë për votimin, thjesht gjeta mundësinë t’i kujtoja kush ka qenë dhe kush është. Mbase nga ata deputetë që janë në Parlament, e njoh pak më shumë Edi Ramën që kur ka qenë i ri dhe nuk mund t’i lejoj vetës dhe demokratëve të na fyej një njeri si ai. Është më minimalja që mund të bëj për demokratët të çoj nderin dhe dinjitetin e tyre në vend”, u shpreh Paloka për Abc.

I pyetur për iniciativën e socialistëve për ta përjshtuar së bashku me Bujar Leskajn nga Parlamenti për 10 ditë, Paloka sqaron: “ Do të duhej që të ishte përjashtuar Edi Rama për atë gjuhë prej ordineri që përdori një ditë më parë. Janë fyerje që i kanë parë dhe dëgjuar të gjithë shqiptarët. Në ekran. Live. Këtë duhet të shohin socialistët”, theksoi Paloka.

j.l./ dita