Artisti Sandro Botticelli as e kishte imagjinuar ndonjëherë Venusin, perëndeshën e dashurisë të paraqitur në kryeveprat e tij të shekullit të 15-të, duke ngrënë spageti ose të veshur me pantallona të shkurtra përpara Koloseut.
Që nga 20 prilli, Ministria e Turizmit në Itali ka vendosur ta kthejë perëndeshën në një influencere virtuale për fushatën më të re të marketingut. Fushata e quajtur “Open to Wonder” me ndihmën e inteligjencës artificiale, shfaq Venusin me veshje moderne, duke bërë selfie në sheshin e Shën Markut, duke hipur në një biçikletë përpara Koloseut dhe duke ngrënë pica në brigjet e liqenit të Komos.
“Një Venus në rolin e një influencereje moderne do të udhëheqë çdo vizitor ndërkombëtar për të treguar vendin tonë. Venusi ikonik i Botticelli-t, do të tregojë bukuritë e vendit nga qytetet më të mëdha te skutat më të fshehta të Italisë. Ne jemi kombi më i bukur në botë, por nuk jemi më të mirët në promovimin e vetvetes”, tha Ministria e Turizmit në një njoftim.
Venusi i ri i animuar ka edhe një faqe personale në platformën “Instagram” ku numëron mbi 100.000 ndjekës.
Shumë ndjekës janë shprehur se ndihen të fyer dhe nuk do ta suportojnë këtë risi të re në fushën e marketingut dhe turizimit.
Sipas shumë prej tyre, përdorimi i një maskote të kompjuterizuar të figurës së Rilindjes është përshkruar si “poshtëruese” dhe “groteske”.
Ndërkohë, të tjerë po tallen me Venusin e shfaqur me mini-fund duke ngrënë picë dhe u duket tejmase e çuditshme.
Të shumtë ishin ata që u shprehën se qëllimi i fushatës është i paqartë. Vendasit kanë po ashtu dyshimet e tyre se Galeria “Uffizi”, muzeu në Firence ku ekspozohet piktura e Botticelli-t, nuk e ka autorizuar përdorimin zyrtar të imazhit të Venusit.
Kodi i Trashëgimisë Kulturore të Italisë kërkon që kushdo që përdor imazhe të trashëgimisë publike për qëllime komerciale të marrë autorizim paraprak dhe të paguajë një tarifë. Kujtojmë se edhe përgjatë tetorit, “Uffizi” njoftoi se do të padiste stilistin Jean Paul Gaultier për përdorimin e Venusit të Botticelli-t në disa prej veshjeve të dizenjuara.
Burimet tregojnë se zëdhënësi i galerisë nuk ka pranuar të komentojë kur u pyet nga “Gazeta Art” nëse muzeu e kishte dhënë autorizimin e tij. As “Ministria e Turizmit” nuk ka bërë asnjë deklaratë publike mbi këtë çështje.
j.l./ dita
