Një sulm izraelit me dron ka ndodhur pranë Sidonit në Liban, aty ku është vrarë një zyrtar i Hamasit. Samer al-Hajj, një zyrtar i Hamasit i ngarkuar me sigurinë në kampin e refugjatëve palestinezë Ain al-Hilweh ka humbur jetën pas këtij sulmi. Mediat libaneze raportojnë gjithashtu se al-Hajj ishte objektivi i bastisjes.
Gjithashtu, raportohet se përveç al-Hajj dhe një tjetër anëtar i Hamasit ka humbur jetën nga ky sulm. Ushtria izraelite ka kryer sulme kundër anëtarëve të Hamasit, grupit aleat të armatosur libanez Hezbollah dhe fraksioneve të tjera në Liban gjatë 10 muajve të fundit, paralelisht me luftën në Gaza.
Këto grupe të armatosura kanë lëshuar raketa, dronë dhe sulme artilerie përtej kufirit në veri të Izraelit. Ndërsa shumica e armiqësive kanë qenë të kufizuara në brezin kufitar midis Izraelit dhe Libanit, sulmet izraelite që synojnë figura të larta në Hezbollah, Hamas dhe grupe të tjera kanë ndodhur më në veri.
Një sulm izraelit në periferi të Bejrutit në janar vrau zëvendës-shefin e Hamasit, Saleh Arouri. Një tjetër sulm izraelit në të njëjtën zonë javën e kaluar vrau komandantin e lartë ushtarak të Hezbollahut, Fuad Shukr. Disa orë pasi Shukr u vra, kreu i Hamasit Ismail Haniyeh u vra në Teheran. Irani dhe aleatët e tij në rajon, përfshirë Hezbollahun dhe Hamasin, kanë fajësuar Izraelin dhe janë zotuar për hakmarrje.
i.b./dita
