Spanjollëve të Sevilla nuk i reziston askush në Europa League, kompeticioni i saj i preferuar, njëlloj si Reali i Madridit në Champions. Me një sezon të dobët në kampionat, arritën fal kohës shtesë në finalen e radhës dhe do tentojnë të nëntën e historisë. Kaluan jo pa vështirësi Juventusin, që i iku kualifikimi në fund. Ko vetëm kaq por u prish magjia për finale italiane, sepse e priste Roma, e cila eliminoi Leverkursen. Goli i Vlahovic ndezi shpresat e juventinëve (takimi i pare u mbyll 1-1), por ishte Suso nga fundi dhe më tej në shtesë, minuta e 95, Lamela, që përmbysën dhe gjetën finalen. Kartoni i kuq në minutën e 115 ndaj Acuna për vonesë loje nuk ndryshoi asgjë në rezultat. Finalja e Europa-League do të jetë mes ‘specialistëve’ të Sevilla dhe Romës së Murinjos.
Kronika e ndeshjes
Në stadiumin Sanchez Pizjuan emocionet ishin të mëdha, me vendasit që në fund patën të drejtën për të festuar. Në fakt, ishin bardhezinjtë ata që u shfaqën më këmbëngulës teksa në pjesën e parë patën disa mundësi të mira, ku veçohet një shtyllë e Moise Kean. Megjithatë, gola në pjesën e parë nuk pati. Në fraksionin e dytë, Juventus gjeti golin me anë të Dusan Vlahovic teksa serbit i mjaftuan dy minuta në lojë për të tundur rrjetën e portierit Bono. Por, vendasit nuk mund të dorëzoheshin dhe gjashtë minuta më pas, Suso riktheu baraspeshën me një perlë nga jashtë zone. Deri në fund nuk pati fitues dhe sfida shkoi në kohën shtesë.
Aty ishin sërish vendasit më kërkues dhe në fakt gjetën edhe golin e përmbysjes me anë të Eric Lamelas në minutën e 95-të. Pas këtij momenti ishte Juventus që u hodh në sulm, mirëpo nuk ia doli të gjente golin, edhe pse në minutat e fundit, Sevilla mbeti me 10 vetë pas Acuna mori kartonin e dytë të verdhë. Gjithsesi, Sevilla në fund festoi biletën e finales së Europa League dhe më datë 10 maj në Budapest do të përballet me Romën.
