Gjykata e Tiranës caktoi këtë hënë masën e sigurisë “arrest me burg” për tre zyrtarët e repartit ushtarak në Zall Herr për kultivimin e 125 bimëve narkotike, të cilat u gjetën brenda territorit të repartit, ndërkohë, katër ushtarakë të tjerë po procedohen në gjendje të lirë.
Pavarësisht se seanca e sotme është zhvilluar me dyer të mbyllura, mësohet se të tre zyrtarët e ushtrisë para togave të zeza kanë mohuar të jenë të përfshirë në këtë veprimtari kriminale, ndërsa janë shprehur se e kanë pasur të pamundur të kryejnë kontrolle në të gjithë sipërfaqen, e cila shkon rreth 140 hektarë.
Avokatët e tyre kanë kërkuar gjatë seancës me dyer të mbyllura, se pa pasur akt ekspertimi nuk mund të ngrihet asnjë aktakuzë. Prokurorja Elona Alvora, bëri me dije se droga u zbulua nga një dron i policisë, në një territor të thyer dhe sipas saj ushtarakët kishin për detyrë që ta kontrollonin terrenin.
Gjatë fjalës së tij shefi i sigurisë Gramos Mulla u shpreh se nuk kishte arritur ta evidentojë këtë ngjarje dhe se i ka kërkuar eprorëve pajisje logjistike por nuk ua kanë vënë në dispozicion. Sipas tij është rreth 140 hektarë tokë gjithsej nga Kamza deri në Dajt dhe ishte e pamundur të kontrollohej e gjitha dhe se droga ishte e kultivuar mes ferrave.
Të arrestuarit janë:
Gramoz Mullai, 52 vjeç, me detyrë Shef Seksioni i Sigurisë
Rustem Koçi, 25 vjeç, me detyrë Specialist për Zbulimin
Gentian Zhurda, 45 vjeç, me detyrë Specialist Sigurie.
p.k\dita
