Kanakarja

Nga Irena Beqiraj

Ateliesë ku qepen ligje me porosi i është shtuar Zamira. Pa u menduar dy herë Zamira propozon që ligji 2710 i vitit 2007 për portet turistike në Republikën e Shqipërisë të ndryshojë!

Zamira shkruan në relacion:

“Ligji 9710 parashikon një rregull të përgjithshëm, realizimin e porteve turistike sipas rregullave konkurruese koncesionare ndërsa Ligji për Investimet Strategjike përcakton proçedura të veçanta administrative”.

Ligji 9710 kerkon që ndërtimi edhe operimi i porteve turistike të jepen me proçedurë konkurruese. Deputetja e re që nuk ka ngrohur akoma karriken e sheh me vend që portet të përjashtohen nga ky rregull edhe të jepen pa garë kur janë pjesë e investimeve strategjike sepse sipas Zamirës “mbivendosjet shkaktojnë vonesa”.

Që Zamira të mos i njoh ligjet nuk është mëkat. Është e re në detyrë. Por që të mos i lexojë ato përpara se të propozojë ndryshime me firmën e saj, kjo është e dhimshme.

E para, Zamira në fillim të vitit 2026 propozon që një ligj i përhershëm (si ai ndërtimit edhe operimit të porteve) të ndryshojë e ti përshtatet një ligj tjetër i cili është i përkohshëm dhe përfundon në… dhjetor 2026 (!)

E dyta, po ta kishte lexuar ligjin për Investimet Strategjike do të kishte parë nenin 17 të tij i cili thotë:
“Kur legjislacioni në fuqi parashikon zhvillimin e procedurave konkurruese / tenderuese / konçesionare vetëm pas përzgjedhjes së subjektit fitues të garës dhe nëse projekti i propozuar përmbush kërkesat e këtij ligji, Agjencia, në bashkëpunim me institucionet / entet përgjegjëse për investimin strategjik, sipas fushave të përgjegjësisë, vlerëson projektin e propozuar dhe i propozon Komitetit të Investimeve Strategjike miratimin e statusit “Investim/investitor strategjik, procedurë e asistuar/e veçantë”.

E pra ligji i Investimeve Strategjike është i qartë: Nëse investimi strategjik përfshin ndërtimin e porteve për të cilat legjislacioni në fuqi kërkon proçedurë konkurruese/ tenderuese /konçensionare / vëtëm pas zgjedhjes së fituesit së konçensionit me garë jepet statusi i investitorit.

E treta, deputetja thotë që ky projektligj është në përputhje me vizionin e qeverisë. Nuk thotë se ndryshimi i propozuar nuk është në përputhje me kërkesat e legjislacionin europian. Për të cilin ajo edhe shokët e saj zunë be e rrufe se do ta përshtasnin në ligjet tona brenda 2027.

Zamirës me shumë gjasa ja kanë dhënë të gatshëm këtë projektligj dhe shpërblimi për bamirësin që e vuri të dytën në listën e mbyllur është ta propozojë atë pa u menduar edhe pse ky ndryshim lejon që kryeministri të jap pa garë pronën publike sikur të ishte pronar i vetëm i saj.

Nuk është kollaj të jesh kanakare, shpërblimi është i rendë! Do të duhet të jesh mbresëlënëse në përpjekjen tënde për të mbetur e për t’u paraqitur në vijimësi si mercenare!

Botuar në Kapital