23 kandidatë konkurrojnë për t’iu bashkuar Këshillit të Lartë Gjyqësor të Shqipërisë (KLGj) dhe Këshillit të Lartë të Prokurorisë (KLP), dy institucione vendimtare në mbikëqyrjen e gjyqtarëve dhe prokurorëve.
Ndër emrat e konkurrentëve, si drejtues për KlGj-në spikat Përparim Kalo, ish-gjyqtar i Gjykatës Kushtetuese. Sipas ekspertëve vendas, kandidatura e Kalos është pretendente e fortë për të drejtuar këtë institucion.
Avokat i njohur dhe ish-anëtar i Gjykatës Kushtetuese, Kalo ka marrë pjesë edhe vitin e kaluar në procesin e përzgjedhjes, ku kandidatura e tij mori mbështetje të konsiderueshme nga shoqëria civile dhe përfaqësues të institucioneve ndërkombëtare.
Një burim diplomatik perëndimor i tha Tirana Times se emërimi i Kalos në krye të KLGj-së do të ishte një investim thelbësor për ruajtjen e integritetit dhe ngritjen e standardeve profesionale të këtij institucioni jetik për reformën në drejtësi që vijon.
Përbërja e dy institucioneve do t’i nënshtrohet rinovimit, ku gjashtë anëtarë pritet t’i bashkohen KLGj dhe KLP. Nga gjashtë anëtarët, tre do të përfaqësojnë shoqërinë civile, ndërsa tre të tjerët do të jenë magjistratë, me një mandat pesë-vjeçar.
Afati i fundit për paraqitjen e kandidaturave nga shoqëria civile në Kuvendin e Shqipërisë ishte 5 gushti, ndërsa magjistratët kanë kohë për të aplikuar deri më 4 shtator.
I gjithë procesi i konkurrimit dhe përzgjedhjes është në përgjegjësinë e Gjykatës së Lartë dhe të Prokurorisë së Përgjithshme.
Vendimi për drejtimin e ardhshëm të këtyre organeve të rëndësishme gjyqësore dhe prokuroriale parashikohet të ketë ndikim të gjerë në përpjekjet për reformim të sistemit të drejtësisë në Shqipëri.
o.p. / dita
