Skenarët që dolën ishin të shumtë, ndërsa ende nuk është zbuluar se me kë është takuar në Moskë shefi i CIA-s, John Ratcliffe dhe çfarë ka diskutuar. E vetmja gjë e sigurt, sipas Kremlinit, është se ai nuk është takuar me Vladimir Putinin.
“Nuk janë planifikuar takime me Putinin”, tha zëdhënësi i presidentit rus, Dmitry Peskov, për agjencinë shtetërore ruse të lajmeve TASS.
Vizita e Ratcliffe ishte udhëtimi i tij i parë zyrtar i njohur në Rusi. Shefi i CIA-s mban kontakte me homologun e tij rus, Sergei Naryshkin, kreu i Shërbimit të Inteligjencës së Jashtme Ruse (SVR), i cili më parë kishte deklaruar gatishmërinë e tij për t’u takuar me të.
Peskov i tha gjithashtu Washington Post se vizita e Ratcliffe kishte të bënte me “kontaktet midis shërbimeve të sigurisë”, pa dhënë detaje të mëtejshme.
Një zyrtar amerikan kishte konfirmuar më parë për Kyiv Independent se drejtori i CIA-s do të takohej me zyrtarë të lartë rusë, megjithëse mbetet e paqartë se çfarë saktësisht është diskutuar në ato kontakte.
Pala ukrainase ishte informuar se një delegacion amerikan do të udhëtonte për në Rusi, por fillimisht nuk ishte informuar se Ratcliffe do të merrte pjesë, sipas një burimi të njohur me çështjen.
Zyrtarët ukrainas pritet të informohen mbi rezultatet e vizitës, megjithëse është e paqartë nëse Ratcliffe do të udhëtojë për në Kiev për t’i informuar ata, shtoi burimi.
Shtetet e Bashkuara gjithashtu i kanë kërkuar Ukrainës të mos kryejë sulme në Moskë ose Shën Petersburg ndërsa Ratcliffe është në Rusi, tha Axios.
Vizita vjen ndërsa Uashingtoni dhe Moska kanë rritur lidhjet dypalëshe nën presidentin Donald Trump, i cili mori detyrën në janar të 2025-ës duke u zotuar të negociojë një fund të luftës së Rusisë në Ukrainë.
Pavarësisht vizitave të përsëritura në Moskë nga të dërguarit e Trump, Steve Witkoff dhe Jared Kushner, bisedimet e paqes në thelb kanë ngecur, pasi Rusia dhe Ukraina mbeten në kundërshtime të konsiderueshme për çështjen e territoreve.
Ishte planifikuar që Witkoff dhe Kushner të bënin vizitat e tyre të para në Ukrainë këtë javë, por udhëtimi i tyre është shtyrë.
Një burim mohoi raportet e mëparshme se shtyrja ishte për shkak të përshkallëzimit të sulmeve ruse, duke thënë se Trump donte t’i mbante dy të dërguarit pranë tij për shkak të bllokimit të vazhdueshëm me Iranin.
Kreu i ekipit negociator ukrainas, Rustem Umerov, foli me Witkoff në telefon më 23 gusht. Sipas të njëjtit burim, Witkoff u zotua të vizitonte Ukrainën në një datë të mëvonshme.
Pavarësisht bllokimit në bisedimet e paqes, Uashingtoni dhe Moska kanë mbajtur kanalet diplomatike të hapura. Këto kontakte ndihmuan në arritjen e një marrëveshjeje më 11 gusht për lirimin e ish-marinsit amerikan Robert Gilman, i cili ishte burgosur në Rusi për katër vjet.
j.l./ dita
