Vokalisti i ‘Backstreet Boys’, Nick Carter, është denoncuar për një sulm seksual të dyshuar. Një grua pretendon se është përdhunuar disa herë nga këngëtari në vitin 2003, kur ajo ishte 15 vjeçe. Padia u ngrit të hënën e kaluar në Gjykatën e Qarkut Clark. Identiteti i viktimës nuk dihet, por në raporte figuron si A.R. Gruaja e ka akuzuar Carterin se e kishte dehur më parë, përpara se ta abuzonte, në një autobus dhe në një jaht.
Sipas ankesës, Nick Carter “e detyroi atë të mbante të fshehtë abuzimin seksual”, madje duke mos përjashtuar që ai e kishte infektuar atë me papillomavirusin njerëzor. Artisti ka mohuar faktet dhe avokati i tij, Dale Hayes Jr., ka argumentuar se ngjarjet kanë ndodhur njëzet vjet më parë dhe se në atë kohë autoritetet përkatëse kanë vendosur të mos vazhdojnë hetimet, për shkak të provave të pamjaftueshme.
“Të njëjtat akuza të rreme po i përsërit edhe në një kallëzim të ri ligjor”, theksoi avokati. Kjo nuk është e vetmja ankesë për sulm seksual që ka marrë këngëtari. Nick Carter u denoncua më parë edhe nga këngëtarja tjetër Melissa Schumann dhe nga një grua e quajtur Shannon Ruth.
