Nga Orgen Peci
Një dokumentar investigativ me fokus te dyshimet për korrupsion në radhët e zyrtarëve të lartë shtetërorë në Shqipëri pritet të publikohet së shpejti nga Austria. Projektit po i prin regjisori dhe producenti i njohur austriak, Frederik Füssel, i cili bazohet mbi dëshminë e një burimi nga Shqipëria, identiteti i të cilit mbahet anonim për arsye sigurie.
Ndryshe nga investigimet e mëparshme që mbështeteshin kryesisht në përgjime telefonike, ky dokumentar synon të sjellë prova direkte mbi transfertat financiare, rrugëtimin e fondeve publike dhe llogaritë bankare të personave të përfshirë në afera korruptive.
Në një sekuencë filmike të shpërndarë në rrjetet sociale nga gazetarja e njohur investigative Lindita Çela, gazetari austriak shfaqet me një pajisje ruajtjeje të të dhënave (USB) në dorë. Sipas dëshmitarit, në këtë pajisje ndodhen prova shkresore dhe të dhëna transaksionesh financiare që fshehin pagesat e kryera ndaj zyrtarëve të akuzuar.
Pritet që investigimi të trajtojë disa prej projekteve më të mëdha publike në Shqipëri, të cilat prej kohësh janë në qendër të akuzave për korrupsion masiv.
Lidhur me këtë publikim, gazetarja Lindita Çela u shpreh:
“Materiali është vetëm një fragment i shkurtër i një investigimi më të gjerë, i cili do të sjellë në vijim detaje dhe prova që hedhin dritë mbi përfshirjen e personave të caktuar. Hetimi dhe procesi i verifikimit të fakteve vazhdon.”
Transkripti i bisedës:
Gazetari: Çfarë përmban kjo USB?
Dëshmitari: Të gjitha të dhënat dhe pagesat e kryera…
Gazetari: Me anë të kësaj mund të shkohet te të gjithë…?
Dëshmitari: Te të gjithë personat që po akuzoj sot.
Gazetari: Pra, këtu keni emrat?
Dëshmitari: Këtu janë emrat, shumat e parave, detajet dhe arsyetimet se pse janë kryer këto pagesa.
Frederik Füssel është regjisor, producent dhe drejtor fotografie austriak me një përvojë të gjatë në mediat ndërkombëtare. Karriera e tij nisi në vitin 1992 pranë ABC TV në Austri, për të vazhduar më tej me realizimin e produksioneve filmike e televizive në më shumë se 50 shtete të botës.
Në vitin 2001 ai themeloi kompaninë FMproductions, ndërsa aktualisht mban postin e drejtuesit ekzekutiv dhe producentit pranë Seven Ocean Pictures.
Füssel është vlerësuar me çmime ndërkombëtare për dokumentarët e tij. Ndër to veçohet dokumentari “Singing for Life”, i cili fitioi Çmimin Special në Prix Italia në Torino (2011). Ndër projektet e tij më të fundit është edhe “People of War” (2024) — një dokumentar i xhiruar gjatë dy viteve në Ukrainë, ku ndiqet puna e vullnetarëve për evakuimin e civilëve dhe shpërndarjen e ndihmave në zonat e luftës.
Më poshtë fragmenti video i shpërndarë nga gazetarja Lindita Çela:
DITA
