Peshkopëve të Kishës Ortodokse Serbe u ndalohet të ndërhyjnë në zgjedhjet presidenciale të Malit të Zi. Këshilli i Peshkopëve të Kishës Serbe u dërgoi atyre një letër në janar, duke paralajmëruar se ata nuk lejohen të marrin pjesë në politikë, të japin deklarata në favor ose në kurriz të partive apo kandidatëve të caktuar.
Megjithatë, Mitropoliti Joanikije ishte i pari që theu rregullin, duke deklaruar se është koha që Milo Gjukanoviç të largohet, duke zgjedhur kështu anën në zgjedhjet e ardhshme presidenciale, shkruan e përditshmja Pobjeda.
Pothuajse të gjithë e dinë mirë qëllimin e ndërhyrjes së Kishës në politikë dhe zgjedhjet presidenciale, pasi ata kanë kandidatin e tyre nga partia e ish-kryeministrit, Zdravko Krivokapiç.
Kisha e Serbisë me shumë gjasa do t’i mbështesë të gjithë ata që përballen me pushtetarët aktuale.
“Sa i përket Malit të Zi, Kisha dëshiron të ketë pushtet në qeveri, të marrë pjesë në të dhe do të mbështetet nga Beogradi. Disa media të Serbisë tashmë kanë tituj – kur qeveria pro-serbe të vijë në pushtet në Mal të Zi, ne do të tërheqim njohjen e Kosovës dhe Mali i Zi, duke qenë shtet anëtar i NATO-s do të vendosë veton për hyrjen e Kosovës në NATO”, tha gazetari Jaksa Scekic për të përditshmen Pobjeda.
Ai gjithashtu thekson se Kisha është mënyra më e lehtë për të sjellë në pushtet opsionin pro-serb në Mal të Zi.
Duke vlerësuar se Kisha ka pushuar së qeni organizatë fetare dhe është bërë politike, Aleksandar Olenik, avokat dhe deputet i popullit, thekson se Kisha e Serbisë është aktore në zgjedhjet malazeze.
“KPS jo vetëm që ndërhyn në zgjedhje, por merr pjesë në to si çdo subjekt tjetër politik. Ata propozojnë kandidatët e tyre dhe njerëzit i votojnë ata”.
j.l./ dita
