“Dhëndri i Sali Berishës, Jamarbër Malltezi, pretendon se ishte trashëgimtar i 27 m2 tokë tek ish Klubi Partizani në Tiranë. Themi pretendon se nisur nga praktika e normuar, parardhësit e tij janë shpronësuar në vitin 1939” – thotë gazetari investigativ Adriatik Doçi.
Si një nga gazetarët hetues të dosjes në fjalë ai akuzon edhe për zhdukjen e dokumentave të shpronësimit:
“Për të gjitha pronat kufitare ekzistojnë dokumentet e shpronësimit, ndërsa për pronën në fjalë, rreth 29 mijë m2, dyshohet se janë zhdukur dokumentet. Arkivi i Shtetit ku gjenden dokumentet e tjera, është drejtuar nga babai i Jamarbrit, me miratim të krushkut në pushtet” – thotë Doçi, duke shtuar se edhe nëse merret e mirëqenë pronësia e falsifikuar e kësaj sipërfaqeje, mbetet enigmë me cilat para u investua në atë zonë.
“E marrim si të mirëqenë sikur dhëndri zëhollë i Berishës është trashëgimtar real i tokës. Për t’a bërë dhëndrin pronar të pronës, vjehrri i tij angazhoi qeverinë nga viti 2006 deri në vitin 2009. Kush refuzoi të firmoste, u kërcënua dhe shkarkua.
Nga trashëgimtar i 27 m2 tokë, dhëndri i Berishës, mjedisori Jamarbër Malltezi ka ngritur 19 kulla, në të cilat ka 35-50 %. Investimin me vlerë dhjetëra milionë euro e ka realizuar duke pasur vetëm 39 mijë euro kursime, pa marrë asnjë kredi, hua apo burim tjetër të dokumentuar.
Kjo dosje korrupsioni besohet se është një nga pikat më të forta të dosjes së DASH për shpalljen non grata të Sali Berishës dhe familjes së tij” – thotë gazetari, duke shtuar se ndërsa të tjerët po bëjnë burg për shumë më pak se kaq, dhëndri i Berishës, jo vetëm është i lirë, por përpiqet të japë mend në rrjete sociale dhe në Universitetin Bujqësor për mjedisin dhe luftën kundër korrupsionit:
“SPAK arrestoi ish kryebashkiakun e Kukësit, Safet Gjici, për një gojore dhe një projekt qensh në tentativë. Prangosi ish kryebashkiakun e Lushnjes, Fatos Tushe për një kanal. Arrestoi ish zëvëndësministren e Brendshme, Rovena Voda për një arkë peshk. Zyrtarë të tjerë janë janë në burg për një qengj, 100 mijë lekë etj.
Natyrisht legjislacioni penal duhet të zbatohet edhe për korrupsionin banal. Këtu nuk ka diskutim. Diskutimi dhe mosbesimi nis kur ligji vepron pa mëshirë ndaj korrupsionit banal, duke i bërë hije korrupsionit madhor…”
