Presidenti rus Vladimir Putin duhet të përballet me drejtësinë ndërkombëtare për luftën e tij në Ukrainë. Ishte kjo kërkesa e liderit të Kievit, Volodymyr Zelensky, e shprehur në fjalimin e mbajtur në Gjykatën Ndërkombëtare Penale. Presidenti që udhëheq rezistencën bëri thirrje dhe për ngritjen e një Tribunali Special për Rusinë për të shqyrtuar makabritetet e ushtrisë dhe zyrtarëve të saj në mënyrë që kjo që po zhvillohet në Ukrainë të jetë lufta e fundit që bota përjeton.
“Jam i nderuar të jem këtu në shtetin tuaj të fuqishëm, në tokën e lirisë dhe drejtësisë, që janë vlera universal për të cilat do të flas tani. Sigurisht, të gjithë ne dëshirojmë një tjetër Vladimir këtu në Hagë, atë që meriton të dënohet për ato veprime kriminale këtu në kryeqytetin e ligjit ndërkombëtar. Kam bindje të plotë se do ta shohim atë të ndodhë, kur ne të fitojmë dhe e dimë se ne do të triumfojmë”, u shpreh Zelensky.
Presidenti ukrainas tha se Gjykata Speciale kundër Rusisë duhet të ndërtohet sipas shembullit të vendosur nga Procesi i Nuremburgut, gjyqeve të zhvilluara nga aleatët kundër përfaqësuesve të Gjermanisë naziste të mposhtur.
Zelensky akuzoi ushtrinë e Moskës se ka kryer 6 mijë krime lufte vetëm përgjatë prillit, me vrasjen e 207 civilëve, përfshirë 11 fëmijë. Ai listoi edhe krime të tjera si masakrat në Donbas dhe Buça.
Ndërkohë, në muajin mars, Gjykata Ndërkombëtare Penale lëshoi një urdhër-arresti për Putin mbi akuzën për rrëmbimin me forcë të fëmijëve nga Ukraina. Por Rusia që nuk është vend anëtar i institucionit të Hagës, refuzon juridiksionin e gjykatës por edhe akuzat e ngritura ndaj Putinit dhe ushtrisë së tij.
o.j/dita
